21/05/2026
طب پوهنځي کې د تلاسیمیا ناروغۍ په هکله د عامه پوهاوي سيمینار دایر شو.
د ننګرهار پوهنتون طب پوهنځي استادانو، ډاکترانو، د جلال اباد ښار د لابراتوارونو مسؤلینو او متخصصینو ته د تلاسیمیا ناروغۍ د تشخیص نویو طبي پرمختګونو، مخنیوي لارو، درملنې او په اړه یې د عامه پوهاوي زیاتوالي په موخه یو ورځنی سيمینار وړاندې شو.
یاد سيمينار د میوند طبي لابراتوار په تخنیکي مرسته د همدې لابراتوار د جنیتیک څانګې مشر ډاکتر صفي الله له خوا وړاندې شو، چې پر مهال یې د تلاسیمیا ناروغۍ د خطرونو، لاملونو، نښو او اغېزو په اړه هر اړخیز معلومات وړاندې شول.
د سيمینار وړاندې کوونکي وویل، چې تلاسیمیا یوه ارثي د وینې ناروغي ده، چې د مور او پلار له لارې ماشومانو ته انتقالېږي او که پر وخت یې تشخیص او مخنیوی ونه شي، د ناروغانو روغتیا او راتلونکی له جدي ستونزو سره مخ کولی شي.
نوموړي همدا راز د تلاسیمیا ناروغۍ د تشخیص په برخه کې د وروستیو طبي پرمختګونو، عصري لابراتواري معایناتو، جنیټیک سکریننګ او د واده مخکې د معایناتو د اهمیت په اړه معلومات ارایه کړل او زیاته یې کړه، چې د وخت مخکې معاینات او عامه پوهاوی کولای شي، د دې ناروغۍ د خپرېدو کچه تر ډېره راکمه کړي.
د ننګرهار پوهنتون طب پوهنځي مرستیال پوهاند ډاکتر محب الله شینواري د میوند طبي لابراتوار له مسؤلینو د مننې تر څنګ وویل، چې د روغتیايي، تعلیمي او تحصیلي مرکزونو او خلکو ګډه همکاري د تلاسیمیا ناروغۍ څخه د پاکې او سالمې ټولنې د رامنځته کولو لپاره اړینه ده او اړونده برخه کې باید ټول خپل مسؤلیت په سمه توګه ترسره کړي.
نوموړي زیاته کړه، چې د ننګرهار طب پوهنځی به راتلونکي کې هم د ورته خطرناکو ناروغیو په هکله د عامه پوهاوي د سيمینارونو او ورکشاپونو د جوړولو زمینه برابره کړي.
سرچینه: د اطلاعاتو، نشراتو او عامه اړیکو امریت
