21/05/2026
غزني کې د څړځايونو پرسر راپورته شوي جنجالونه پای ته ورسېدل
پنجشنبه ۴ ذوالحجة الحرام ۱۴۴۷
د غزني ولایت د مالستان ولسوالي اړوند د کوچیانو او مېشتو هزاره ګانو ترمنځ د څارويو د څړځایونو او مېله ځای پر سر راپورته شوې لانجه د حل په موخه د ياد ولايت د سرحدونو، قومونو او قبایلو چارو ریاست ته راجع او د دواړو لوريو استازو په ګډون ګډه ناسته ترسره شوه، چې د ستونزې د حل لپاره لازم بحثونه او خبرې اترې وشوې.
د ناستې پر مهال د غزني ولایت د سرحدونو، قومونو او قبایلو چارو رئیس د دواړو خواوو خبرې واورېدې او د متقابل احترام پر بنسټ یې د ستونزې د هواري هڅې وکړې، چې د مسؤلینو د هلو ځلو او د دواړو لوريو د همکارۍ له امله یاد اختلاف په سوله ییز ډول حل شو.
په پای کې د دواړو اړخونو استازو ژمنه وکړه چې له دې وروسته به د یو بل حقونو ته درناوی کوي له هر ډول شخړې او تاوتریخوالي به ډډه کوي او د ورورولي ګډ ژوند ته به ادامه ورکوي.
