03/06/2026
أنت رفيع كده ليه يا بني؟ أكيد في دودة في بطنك وبتاكل أكلك 🪱
سمعت الجملة دي كتير من طنط وأنت صغير بس تعرف بقى إن طنط ممكن تكون صح؛ دي عدوى وإسمها Helminthic Infection، شوفت بقى يلا بينا نشوف بقى طنط عندها حق ولا إيه.
ال Helminthic Infection هي عدوى بتسببها الديدان الطفيلية ومن إسمها هي كائنات بترخم على جسمك وتتطفل عليه، ومش بس كده دي بتتغذى على محتويات الأمعاء وفي منها كمان بتتغذى على الدم مباشرة وسوائل الجسم بأنواعها وفي منها بقى باشا مش بتحب تتعب نفسها خالص؛ بس متظلمهاش ده لأن معندهاش جهاز هضمي اصلا فبتمتص الغذاء جاهز على طول عن طريق الجلد وبتاخد اللي يفيدنا من جلوكوز وفيتامينات😮.
ودلوقتي بقى هقولك أمثلة عشان تفهم خطورتها أكتر،ال Ascaris ودي تصنف من الNematods و بتتغذى على محتويات الأمعاء، وبتعيش في الأمعاء الدقيقة وكترهاممكن يسبب انسداد في الأمعاء وطبعا هي بتسبب ضعف عام ونقص في الوزن.
ال Wuchereria bancrofti ودي بقى بتتغذى على سوائل الجسم (الليمف)، وبتعيش في الجهاز الليمفاوي وعشان كده بتسبب ما يعرف بداء الفيل (Elephantiasis) ورم شديد وتضخم في الأطراف.
أما بقى ال Schistosoma mansoni بتتغذى على الدم مباشرة، وبتعيش في الأوعية الدموية وطبعا بتسبب أنيميا، كل دول بقى بنعرفهم من خلال تحاليل معينة بتتحكم حسب نوعها ومعظمهم بنعرفهم من Stool or Blood analysis.
وده يعلمك لما تسمع حاجة تدور وراها يمكن يكون ليها أساس علمي اهي طنط طلع عندها حق اهي وأنت كنت فاكره هزار يا أستاذ😉.
