11/04/2025
قسم هندسة القوى والألات الزراعية👷♂️🚜
مبدأياً كدا زي ما في عندك حاجه اسمها ميكانيكا سيارات🚗 وميكانيكا طائرات ✈️ احنا بقا في هندسة زراعية عندنا ميكانيكا جرارات وألات زراعية 🚜
طب ليه القسم مهم وليه موجود في كلية هندسة زراعية مش تبع قسم ميكانيكا في كليات الهندسه؟
اقولك مثال صغير عشان تفهم دا :
لو واحد عاوز يصمم عربيه مناسبة للبيئة المصرية تفتكر المفروض يدرس إيه؟
لو درس ميكانيكا سيارات بس هتكون النتيجه انه هيعمل عربيه من الناحيه الميكانيكيه جيدة جداً لكن لاتصلح للبيئة المصرية 🤷♂️
ولو درس طبيعة البيئة المصرية بس مش هيعمل عربيه أصلا🙂
يبقا الحل إنه يدرس تطبيق تصميمم سيارات في البيئة المصرية
وهو دا بالظبط الي قسم هندسة الألات والقوى الزراعيه بالكلية
انت بتدرس كل المواد الهندسة الي تحتاجها في تصميم الألة مع بعض المواد الزراعية التي تساعدك في التصميم بما يلائم ظروف الارض والنبات وطبيعته المورفولوجيه والفسيولوجية
مواد القسم بتدرس محركات احتراق وتصميم ألات وأجهزة قياس وكهربا وبرمجه وصياتة وتشغيل معدات وألات رش وغيرهاا من المواد
