LOUCEIR@S DE BAMIO E A NOSA HISTORIA ORAL
A parroquia de San Xinés de Bamio, está situada na marxe sur do estuario do Ulla, na ría de Arousa. Trátase dunha paisaxe litoral fortemente modificada nos derradeiros anos pola acción humana, no que convive un aproveitamento rural tradicional e tamén de ámbito urbano. A importante tradición oleira ou louceira de Bamio, coñecida a través de documentos his
tóricos, arqueolóxicos e diversas testemuñas, está totalmente perdida na actualidade. A finais dos anos 40, os derradeiros louceiros de Bamio abandonaron o traballo do barro e a súa memoria perdeuse, a diferencia doutras tradicións conservadas ou recuperadas en Galicia (como as de Buño ou Gundivós...), aínda que coñecemos pezas orixinais saídas dos seus fornos, e conservadas en importantes coleccións e museos, como o Museo do Pobo Galego, ou o Museo de Pontevedra. Tamén podemos atopar polas leiras e xardíns de Bamio, restos de louza, rodas de oleiro, píos e outros elementos. Dende hai uns meses a Asociación de Mulleres Rurais xunto a Beatriz Comendador, investigadora e profesora da Universidade de Vigo, levamos traballando no proxecto Louceiros de Bamio. A intención é a recuperación de memoria oral compartida da parroquia de Bamio, para conservar e revitalizar aspectos que, xuntamente coa memoria dos louceiros, teñen conformado a nosa cultura. Creemos que un proxecto así podería ser beneficioso para a veciñanza e precisamos da vosa colaboración, o que podedes facer de diferentes xeitos:
• Falando cos mais vellos, que quizais lembren cousas como o nome dos lugares e outras historias.
• Buscando fotografías antigas
• Buscando se queda louza polas casas e os xardíns, ou outros elementos como rodas ou pías
• Recollendo e aportando lembranzas e saberes da zona
• Participando nos distintos eventos e reunións que terán lugar
• etc
Ti decides:
• Que coñecemos?
• Que conservamos?
• Que protexemos?
