30/03/2026
NORTH COTABATO BLUE PALM BEACH RESORT
Marso 29, 2026 – Nagtigom ang mga lider gikan sa nagkadaiyang rehiyon sa nasud alang sa ika-46 nga National Assembly 1st Regular Session sa The Fraternal Order of Eagles -Philippine Eagles , diin gipasiugda ang tema nga “Service Through Strong Brotherhood” isip giya sa ilang padayong misyon sa pagserbisyo sa komunidad.
Sa iyang pakigpulong, si Eagle Nilo P. Demerey, Jr., Charter President sa Islander Dragons Eagles Club ug Gobernador sa Dinagat Islands, nanawagan sa mga miyembro nga palig-onon pa ang ilang panaghiusa ug dedikasyon sa pagtabang sa mga kabus ug nanginahanglan.
Atubangan sa ginatus ka mga delegado, iyang gihisgutan ang hapit 50 ka tuig nga kasaysayan sa organisasyon sa paghatag og suporta ug paglaum sa mga marginalized nga sektor. Gipunting niya nga ang panaghiusa ug hiniusang paningkamot mao ang pundasyon sa ilang kalampusan.
Giawhag usab niya ang mga miyembro nga ipadayon ang pagpalapad sa ilang boluntaryong serbisyo ngadto sa mas daghang lugar, atubangon ang lalom nga mga isyu sa katilingban, ug lig-onon ang panaghiusa bisan pa sa kalain-laing kultura ug lokasyon.
Gipasiugda niya nga ang “Service Through Strong Brotherhood” dili lamang motto, kondili usa ka saad ug kabilin nga angayan padayonon uban sa bag-ong kusog ug hugot nga pagtuo nga pinaagi sa panaghiusa, posible ang pagbag-o sa kinabuhi sa mga labing nanginahanglan.
Ang maong ika-46 nga National Assembly nagtigum sa mga lider sa organisasyon aron maglatid sa mga prayoridad ug direksyon sa ilang mga programa sa pagserbisyo sa tibuok nasud alang sa mosunod nga tuig.
🦅
