18/04/2026
Ardayda kulliyadda Af Soomaaliga ee Jaamacadda Bayaan oo safar gaaban ku tagey duleedka magaalada. Socdaalkaasi muu ahayn mid caadi ah, balse waxa ku ladhnaa farxad, damaashaad, aqoon iyo waayo-aragnimo ay wadaagaan qalbiyo isku jiho u socdaa.
Goobta la tegay qudheedu, ayaa noqotay goob farxada dhammaystirtay. Hawo nadiif ah iyo muuqaal dabiici ah oo maskaxda dejinaya, oo qayb laxaad leh ku lahayd xiisaha kulanka. Barnaamijku qudhiisa ayaa ahaa mid si habsami leh loo qorsheeyey, oo mudanta kulliyada ka qallin jiidataa isugu tagtay, kuna qotoma isu dheellitirnaan u dhexaysa madadaalo iyo aqoon. Goobtaas waxa lagu soo bandhigay suugaan kala jaad ah—gabayo, geeraarro iyo maansooyin xambaarsan dareenno kala duwan. Sidoo kale, sheekooyin kala duwan ayaa la is dhaafsaday; qaar xambaarsan duruus nololeed, iyo kuwo kale oo kaftan ah oo qosol iyo raynrayn geliyey dhammaan ka qaybgalayaasha.
Heesaha la qaaday waxa ku jilnaa dareen iyo xasuus, murugo tegay iyo mahadhooyin quluubta kaga tegay xasuuso lama ilaawan ah. Halka tartamada iyo ciyaaro dhaqameedku ay soo nooleeyeen hiddaha iyo dhaqanka baadisoocda inoo ah, isla markaana ay abuureen tartan xiiso leh iyo is-dhexgal iyo isbarashana weheliso . Waxa ay ahayd meel uu qof walba ku muujiyey hibooyinka uu Alle ku abuuray—qaar ayaa aftahamo yaableh lasoo baxay, qaar suugaan, halka kuwo kalena ay ciyaar iyo kaftan ku muujiyeen kartidooda uu godliyey kullankan qiimaha lihi.
Kulanka waxa bilay macallimiin qiimo weyn ku leh kobcinta aqoonta iyo dhiirrigelinta ardayda: Mustafe Qaraami, Mohamed Ali Shaacir , Maxamed Dareem, iyo Cabdikhaalaq.
Doorkoodu muu ahayn oo keliya kormeer, balse waxay ahaayeen laf-dhabarta barnaamijka, iyo meesha ay kasoo burqanaysay farxada dhammaantayo na maashaysay. Sidoo kale waxay kaalin mug leh ka qaateen hagidda iyo xoojinta jawiga waxbarasho ee madadaaladu ku lammaan tahay.
