27/11/2025
📅📖 Hoxe, 27 de novembro: DÉCIMO ANIVERSARIO DO PASAMENTO DE NEIRA VILAS
Cúmprense dez anos sen Xosé Neira Vilas, mais a súa palabra segue viva entre nós: nas reedicións dos seus libros, nos títulos póstumos, nos epistolarios e, sobre todo, na memoria colectiva do seu público lector.
Este día tan sinalado celebrarémolo en Gres, a súa terra natal, cun acto que comezará coa colocación dun ramo de flores no cemiterio da parroquia de Santiago de Gres, onde repousa xunto a Anisia Miranda, compañeira de vida e proxecto.
A continuación, na Casa do Romano, sede da Fundación, presentarase o volume Correspondencia 1965–2014, que recolle o longo intercambio epistolar entre Neira Vilas e Xesús Alonso Montero, quen intervirá para compartir vivencias e reflexións sobre esta amizade literaria.
Tamén participarán no acto:
📘 Xosé Manuel Soutullo, director xeral de Editorial Galaxia
🗣 Valentín García Gómez, secretario xeral de Política Lingüística
Un día para lembrar, recoñecer e seguir celebrando a figura e o legado dun dos grandes da nosa literatura.
