22/08/2026
مش زي ما أنت فاكر | 01
معلم قال لي مرة:
"دخلت الحصة وأنا أصلًا متضايق من مشكلة حصلت قبلها…
الطالب غلط مرتين واتأخر شوية في الإجابة، ولقيت نفسي متعصب منه زيادة عن الطبيعي."
سألته:
"هو فعلًا عمل حاجة تستحق كل ده؟"
سكت شوية وقال:
"لأ… غالبًا أنا كنت داخل متعصب أصلًا."
وده بيحصل من غير ما ناخد بالنا.
مش معنى إنك معلم إنك لازم تبقى هادي ومبسوط طول الوقت.
أنت إنسان، وطبيعي تدخل الحصة وأنت مضغوط أو متوتر أو مستنزف.
لكن المشكلة لما الطالب يبدأ يدفع ثمن حاجة هو أصلًا ما يعرفش عنها أي حاجة.
قبل الحصة بدقيقتين اسأل نفسك:
أنا داخل الحصة عامل إزاي؟
متوتر؟
مضغوط؟
غاضب؟
مستنزف؟
السؤال بسيط، لكنه بيفرق.
لأن في فرق بين:
"أنا متضايق"
وبين:
"الطالب مستفز."
وأحيانًا إحنا بنشوف تصرفات اللي قدامنا من خلال الحالة اللي إحنا فيها أصلًا.
فلو لقيت نفسك متعصب من طالب زيادة عن الطبيعي…
ما تستعجلش وتقول:
هو مهمل
هو مش مهتم
هو بيستفزني
اسأل نفسك الأول:
هو فعلًا السبب… ولا أنا دخلت الحصة بحاجة تانية معايا؟
