20/12/2025
ترددت إني اتكلم في الموضوع دا على الملئ بس حجم الكارثة كبيرة جداً .. فلازم ناخد بالنا.
من كذا شهر كان حصل تسريب لصور بنت مصرية ( صور بملابس البيت وملابس داخلية )، الصور تم نشرها على نطاق ضيق شوية لأنها مش معروفة أو مشهورة، تم تداول صورها على حسابات على تطبيق إكس ( تويتر ) والحسابات دي شغلتها إنها بتنزل صور عريـ ـانة لبنات وتسريبات.
حساب من ضمن الحسابات اللي نشرت الصور دي كان حطط لينك لويب سايت بيبيع الصور بفلوس فحبيت استكشف الموضوع بشكل أكبر لقيت فعلا في مواقع محتواها إنها بتبيع محتوى جنـ ـسي! الألبوم بـ 40 جنيه في بـ 50 وفي بـ 100 جنيه، على حسب الطلب على الألبوم..
الموقع بيعرضلك صورتين مثلا فري ولو عجبك الشخصية أو الشكل وعايز تتفرج على باقي الألبوم تخش تدفع بالفيزا علشان تقدر تتفرج!
مفهوم المواقع الإبـ ـاحية معروف عند الكل وبيزنس كبير بيتصرف عليه سنوياً ما لا يقل عن 50 مليار دولار من إنتاج أفلام وإعلانات، ولكن اللي كان غريب بالنسبالي إن الموقع اللي بتكلم عنه بيبيع صور لبنات عادية مش معروفة، البنات دي ممكن تكون أختك، مراتك، أمك أو حتى جارتك! أشخاص طبيعين وصور عادية مش احترافية.
والغريب في الأمر إني اكتشفت إن النوع دا من المحتوى مطلوب وليه جماهير كبيرة جداً لأنه وطبقا لاعترافات واحد من الكومنتات على بعض الصور، إن دي صور حقيقية لبنات حقيقة مش تمثيل فليها إثارة أكبر للمتابعين اللي بيشتروا الألبومات دي.
بعدها اكتشفت إن في سورس أو مخزن بيتخزن فيه كل الصور اللي بيتم بيعها والتجارة فيها، موقع تخزين سحابي إسمه Telebox دا موقع وأبلكيشن بيتخزن عليها داتا ضخمة جداً ومساحات التخزين دي بيندفع فيها فلوس بالدولار لحفظ البيانات دي.
عن طريق واحد على تويتر قدرت أوصل إني أدخل على الستورج دي وهنا كانت الصدمة الكبرى بالنسبالي، أكتر من 300 ألف صورة متسربة لبنات من على موبيلاتهم، الصور متقسمه فولدرات كل فولدر فيه فولدر صور وفيديوهات لو فيه، مئات الألاف من الصور والفيديوهات متقسمه بشكل منظم.
في بعض الفولدرات محطوط فيها بيانات شخصية للبنت، زي إسمها وحسابها على فيسبوك أو انستجرام وأحياناً عنوان بيتها كمان، وبيكون محطوط ليها صور عادية بملابس خروج وبيتم البيع بيها لو عايز صور البنت دي من غير ملابس اشتري الألبوم!!
ألاف من الألبومات اللي لو قعدت سنة كاملة مش هتقدر تخلصهم!! والأكبر من كدا كمان إن الألبومات دي بتتحدث بشكل لحظي! بدون أدنى مبالغة كل كم دقيقة بيدخل صور جديدة وألبومات جديدة!!
وبما إن عندي خبرة كويسة في مجال السوشيال ميديا قدرت أوصل لشبكة من الأكونتات على فيسبوك وإكس بيتاجروا بالصور دي بعيداً عن المواقع المدفوعة، وحاولت إن أقفل الأكونتات دي، بس كما هو متوقع بيتعمل حسابات تانية في نفس اليوم، على سبيل المثال في واد شاب كان بيشتغل بحسابات بنات إسمها كنزي عمل 15 أكونت في أقل من شهرين!
الفكرة هنا والتساؤل الأهم من كل دا، هما بيوصلوا للصور دي إزاي؟!
التسريبات اللي من النوع دا بيكون ليها أكتر من مصدر، أهمهم وأخطرهم على الإطلاق هي مراكز ومحلات صيانة الموبايلات!
حضرتك لما موبايلك بيحصل فيه عطل بتوديه لمحل يصلحه، الشخص اللي بيصلح موبايلك بيكون عنده إمكانيه وصول كاملة على كل الداتا اللي على موبايلك حتى لو إنت مسحتها، برنامج بربع جنيه بيقدر يرجع الداتا المحذوفة، فالراجل بياخد بصة على الداتا اللي عندك خصوصاً لو الموبايل بتاع بنت.. وهنا بنسة 80% هتلاقي صور مش كويسه للبنت!
سواء بقى البنت متصوره الصور دي لجوزها أو لواحد بتحبه فبعتاله صورها بملابس خفيفه أو عريانة! أو حتى لو البنت متصوره لنفسها من باب حب الذات وخصوصا إن في بنات كتير بتتصور من باب إنها بتحب تتصور حتى لو مش هتبعت الصور دي لحد!
وكون إن موبايلك بيتصلح فالصور دي كلها بتتنقل، لو الراجل صاحب المحل دا عنده علم بالمتاجرة أو التربح من الصور اللي زي دي هيبقى بالنسباله بزنس مربح أكتر من أرباح مركز الصيانة نفسه! ولو معندوش علم هيحتفظ بالصور دي لنفسه ولأصدقاءه وهيتم تداول الصور لحد ما توصل لشخص هيبيعها.. أو على الأقل ممكن يبتز صاحبة الصور!
بقالي فترة بحاول إني أقفل الستورج اللي بيتخزن عليها الصور دي وإتكلمت مع رجال أمن ومهندسين اتصالات ومفيش حل ملموس للأسف! لأن الموقع دا موقع عالمي مش حاجة محلية، والبيانات متأمنة! بل وعلشان تقدر تدخل على الستورج دي لازم حد من القائمين عليه يعملك دعوة! وفي فولدرات جوه متأمنها بأرقام سرية!
وبعد محاولات عديدة اتضح ليا إن الستورج دي في منها نسخ كتيرة على مواقع تخزين تانية وطلع الموضوع أوسع وأكبر من ما كنت متخيل، وحتى لو قدرنا نقفل الستورج دي في غيرها كتير!!
كل اللي قدرت أعمله إني بعت ميل رسمي للشركة المالكة للأبلكيشن والويب سايت دا لعل وعسى يعملوا حاجة مع إني مظنش! بس علشان أكون أخليت ذمتي!
فرجاء لو حضرتك بنت وبتقرأي الكلام دا، بلاش تحفظي صور شخصية ليكي على موبايل حد غيرك يمسكه!
ولو الموبايل محتاج تصليح تختاري شخص موثوق منه أو تروحي التوكيل أضمن! ولو الموضوع صعب فالحل الأمثل إنك تمسحي كل الداتا اللي على الموبايل وبعد كدا تملي كل الستورج بتاعت الموبايل بأي حاجة تانية زي إنك تنزلي أفلام على موبايلك وتملي بيها المساحة كاملة وبعد كدا تمسحي الأفلام وتكرري الموضوع دا مرتين وتمسحيهم، كدا هتضمني إن لو بتاع الصيانة قرر يرجع داتا محذوفه هيرجع الأفلام!
لو إنت شاب حاول توعي كل البنات القريبين منك وعيلتك، لأن الموضوع واصل لكل البيوت حرفياً ....
منقول من Ahmed Nagah
تعليق؛
في شباب كتير بيحاولوا في الموضوع دا لكن الموضوع اكبر مما تتخيلوا ..
تجارة عالمية وموجودة في الديب ويب على صور البنات والستات..
صفحات ببتتربح من صورك لمجرد أنها صورك ..
السوشيال ميديا مش مجال لوضع صورك دا غير كم كبير من السيئات الجارية ال بتخديها..
ربنا قال في كتابه العزيز..
ذَٰلِكَ أَدْنَىٰ أَن يُعْرَفْنَ فَلَا يُؤْذَيْنَ ۗ ..
ارجوك حافظي على نفسك ..
متنشريش صورك على الانترنت..
لأنه سوق نخاسة كبير...
لا انتوا ولا اطفالكم...
دا غير برامج الذكاء الاصطناعي ال بتاخد صورك تعمل بيها فيديو كليب وفيلم خارج كانك انت بالظبط الموضوع بدأ بصور الممثلات وانتهى بصور بنات منشورة عادي على الانترنت..
احفظي نفسك احنا في فتنة والرسول قال لو جاءت الفتنة اقفلوا عليكم ابوابكم..
الصورة مصممة بالذكاء الاصطناعي...
