15/08/2026
😱فجأة الكل اصبح مدرس برمحة😱
مش فاهم… هو كل ما الوزارة تقول "برمجة" لازم فجأة كل مهندس وطالب هندسة يبقى مدرس؟! 🤔
من فترة وأنا ألاحظ كمية إعلانات غريبة جدًا بدأت تظهر مع الإعلان عن تطبيق البرمجة في الصف الثاني الثانوي ضمن مسارات البكالوريا.
سناتر بتعلن عن مدرسين برمجة، ومهندسين وخريجي حاسبات ومعلومات بيعلنوا عن نفسهم، وده في حد ذاته مفهوم لو الشخص عنده خبرة حقيقية في التدريس.
لكن اللي لفت نظري أكتر إن فيه طلاب لسه بيدرسوا في كليات الهندسة بدأوا هم كمان يعلنوا إنهم هيقوموا بتدريس البرمجة لطلاب المرحلة الثانوية!
وهنا أنا مش بتكلم عن شخص بعينه، ولا عندي مشكلة مع مهندس أو خريج حاسبات عايز يشتغل في مجال التدريس.
لكن عندي سؤال بسيط:
هل مجرد إنك بتدرس هندسة أو اتخرجت من حاسبات ومعلومات معناه تلقائيًا إنك مدرس برمجة لطلاب الثانوية؟
فيه فرق كبير جدًا بين إنك تعرف تبرمج، وبين إنك تعرف تدرّس البرمجة.
المدرس مش دوره إنه يستعرض معلوماته أو يكتب كود قدام الطالب. المدرس محتاج يعرف:
- مستوى الطالب الحقيقي.
- إزاي يبسط المفهوم.
- إزاي يبني المعلومة خطوة بخطوة.
- إزاي يتعامل مع الفروق الفردية.
- إزاي يحول المعلومة لتدريب وممارسة.
- إزاي يفهم طبيعة الطالب المصري والمنظومة التعليمية.
- والأهم: إزاي يعلّم الطالب مش إزاي يثبت إنه هو فاهم.
وده مش انتقاص أبدًا من خريج حاسبات أو مهندس، بالعكس، ممكن يكون مبرمج ممتاز جدًا، لكن التخصص في البرمجة شيء، والتخصص في تعليم البرمجة شيء آخر.
ما يثير استغرابي فعلًا هو سرعة تحول الموضوع إلى سوق دروس وإعلانات وسناتر بمجرد ظهور كلمة "برمجة" في الثانوية.
وكأننا أمام فرصة تجارية جديدة، وكل شخص لديه خلفية تقنية يريد أن يحجز مكانه فيها.
«هل أصبح امتلاك معرفة تقنية كافيًا لاعتبار الشخص مؤهلًا لتدريس طلاب المدارس؟»
لأن التعليم مش مجرد معلومة، التعليم مهنة، والبرمجة نفسها مش مادة سهلة لمجرد أن اسمها "برمجة".
الطالب محتاج حد يفهمه، ويصبر عليه، ويبني عنده التفكير المنطقي خطوة خطوة، ويعرف هو داخل منين وإيه اللي يناسب سنه ومستواه، مش مجرد حد يعرف يكتب الكود.
أتمنى قبل ما تبدأ تساءل نفسك: مين هيشرح لى البرمجة؟
انا لا أملك إجابة قاطعة، لكن عندي حق كامل كمتخصص في المجال وكمعلم قضى سنوات طويلة فيه أن أقول:
الموضوع مقلق وليس مجرد مادة جديدة والأيام القادمة ستثبت ان كان القلق في محله أم أننا كنا بنبالغ في التخوف.
لكن المؤكد بالنسبة لي:
البرمجة مهمة جدًا… لكن طريقة تقديمها للطالب أهم من مجرد وضع كلمة "برمجة" في جدول الثانوية.
#البرمجة
#التعليم
