20/08/2026
تنسيقك دخلك كلية تجاره ؟ ... كلية الشعب
الدفعه الجديده اللي هتدخل الكليه
اكيد انت سمعت الكلمه دي من ناس كتير اوي اول م عرفوا إنك داخل تجاره
طب م تيجي معايا اعرفك اي هي كلية تجاره
كلية تجاره من اكتر الكليات اللي مش واخده حقها جمب باقي الكليات
خصوصا إنها بكل أقسامها داخله فكل مجالات حياتنا تقريبا
-انت اكيد سمعت كلام سلبي كتير عن كلية تجاره
لكن تعالى اقولك الحقيقة اللي مش متشافه أو اللي مش بيتقال
أول حاجه كدا لما بتروح تقدم على وظيفة وتروح تقابل HR اللي بتبقى داخل الانترفيو عامله 100 ألف حساب بيبقى خريج تجارة وواخد كورسات تأهله يشتغل الشغلانه دي
طيب لما حد بيكون حابب يفتح مشروع او شركة او حد عنده بالفعل عنده شركة وبيحتاج خطه محاسبية محترمه عشان تعرف رأس المال والأرباح و حد يديك نصائح عشان تعلي من ارباحك مين اللي بيشتغل الشغلانه دي برضه خريج كلية تجارة!
لما بتشوف اعلان عن حاجه كنت بتفكر فيها من كام لحظه و تشتري منه بالفعل مين اللي بيبقى عامل الأعلان دا بيبقى حد من خريجين كلية تجارة بيبقى دارس ماركيتينج لان الكليه ليها اقسام كتير و تفرعات كتير!
مجالات الشغل اللي تابعه للكلية لا تعد ولا تحصى زي :
جميع اقسام المحاسبة بترتيبها الوظيفي في أي شركة أو مصنع
الشغل في بنوك بكل اقسامها
اقسام الموارد البشرية
التسويق الإلكتروني
شركات التأمين
البورصة
مكاتب محاسبة
وزارات زي وزارة المالية
دراسات الجدوى
الضرائب
كل دي مجالات وأكتر عرفتها ولسه أكيد في حاجات تانية متكلمتش عنها
اخر حاجه هقولها هي كلمه سمعتها من دكتور ف الكليه ف اول يوم
قال "مفيش اي منشأه او مكان ف العالم مش محتاج واحد خريج تجاره ... من اصغر محل لحد اكبر شركه International ف العالم "
وبقولك مرحبا بك في كلية العظماء
