01/08/2023
صديقي طالب ثانوية عامة علمي رياضة اللي جايب مجموع مرحلة أولى
الفترة دي هتسمع كلام كتير عن إن هندسة كلية منتهية ومفيش شغل ومش عارف ايه
بس لازم تبقى فاهم إن اللي بيقول الكلام دا هي الفئة اللي مش لاقية شغل، لكن اللي لاقي شغل في وضع كويس مش هيطلع يقولك على الفيس هندسة حلوة وفيها فلوس عشان ببساطة هيخاف من الحسد، لازم تبقى فاهم دا كويس
أنا شخصيًا أعرف مهندسين مش شغالين وأعرف مهندسين شغالين بمرتبات ضعيفة وأعرف مهندسين شغالين بمرتبات خيالية
ف لازم تفهم كويس إنه في الأول والآخر دا رزق من الله بس لازم تسعى له وتاخد بالأسباب وحط خط تحت الأسباب دي
ببساطة معظم طلبة هندسة عايزين يدخلوا الكلية يذاكروا على قد الامتحان ولا ياخدوا كورسات ولا تدريبات ولا يتعبوا ف أي حاجة طول فترة الكلية الا الاسبوع اللي قبل الامتحان
هو شايف إنه يستحق يشتغل شغلانة كويسة بمرتب عالي لمجرد إنه دخل هندسة، ف لو انت النموذج دا من الطلبة يبقى متدخلش هندسة فعلًا لأنك مش هتشتغل ولا بعد مليون سنة
لكن لو انت مستعد تتعب وتموت نفسك في أول سنة في هندسة اللي هي "اعدادي" بحيث تجيب مجموع عالي يدخلك قسم فيه فرص واسعة زي اتصالات أو حاسبات مثلًا ثم بعد ما تدخل القسم هترجع تذاكر تاني وتتعب تاني ويطلع عينك في مواد الكلية ثم هتاخد كورسات وتنزل تدريبات وتتعب أضعاف في فترة الأجازة
لو مستعد تعمل كل دا ف اوعى تسمع كلام اللي بيقولك متدخلش هندسة لأنه حرفيًا بيضيع منك فرصة ذهبية والله، لو عملت كل دا هتدخل هندسة تطلع منها ملك ومش هتندم عليها لحظة وحدة
