10/08/2016
جميل جداً, السما هتمطر شهب بكره بالليل، أقصد الليلة اللي بين الخميس و الجمعة 11 و 12 أغسطس, البداية هتبقا من بعد 12 صباحا و انتا طالع لحد الصبح، لكن حوالين الفجر - أفضل موعد هو من 2 لـ 4 - هتبقى الشهب أكتر ، اللي بيحصل ده اسمه زخة شهابية meteor shower
يعني ايه زخة شهابية؟
يعني هطول امطار شهابية بمعدلات عالية، الزخة دي اسمها البرشاويات ، بتنزل الشهب من السما بمعدل ممكن يوصل ل 80 شهاب في الساعة و في الصحرا ممكن 160 شهاب في الساعة ، احنا ممكن طول السنة نشوف شهاب او اتنين، لكن في مواعيد الزخات دي بنشوف اعداد اكبر بكتير
طب ليه بتحصل؟
بتحصل لما الارض تمر في بقايا مذنب كان معدي من الحتة دي، في اثناء دورتها حوالين الشمس، الموضوع عامل زي ما تكون راكب عربيتك و تدخل في شوية دخان على الطريق، البقايا هنا هيا لمذنب سوفت تتل، بتدخل للغلاف الجوي بسرعات عالية ممكن توصل ل 70 كيلو ف الثانية، فتتحرق لما تحتك مع الغلاف الجوي، و نشوف الشهب دي
ايه افضل مكان ابص منه؟
في كل حتة من الوطن العربي تقدر تشوفها,
القاعدة بسيطة: كل ما تبعد عن النور اكتر، كل ما تشوف شهب اكتر، لكن دايما بنقول ان افضل مرصد في العالم هوا فوق سطوح بيتكم
هل هحتاج ادوات للرصد؟
عينك المجردة فقط، و حصيرة تنام عليها و ترفع راسك للسما، و عصير ساقع ان امكن، و رفقة طيبة ان أمكن جدا ، صديق .. زوج .. حبيب .. اب .. ام .. اولاد .. اكتر شيء بيرفع متعة الرصد للشهب هوا حلاوة الرفقة ذاتها ،
السما كبيرة، هبص فين؟
من غير تعقيدات فلكية كتير، بص فوقك لكن ميل ناحية الشمال الشرقي العادي بتاعنا بعينك ، في كل الاحوال الشهب هتملا السما كلها
هل فعلا ممكن اشوف 60 شهاب؟
و الله ممكن، من كام سنة شفت مع مي بتاع 70 شهاب في ساعتين بس ، و في مرة شفت فيها 40, فيه اوقات مبنشوفش فيها كتير برضك، الموضوع زي ما قلنا ليه علاقة بكم الضوء حواليك ، و حالة السما، لو انتا في جوة مدينة مزدحمة هتشوف اقل بكتير، لو انتا قريب لقرية او صحرا او كده هتشوف كتير جدا
جوة القاهرة مثلاً ممكن تشوف بالكتير 10
المراكز الصغيرة ممكن 30
القرى ممكن 100
الصحرا تشوف 200
هل ده حدث نادر؟
لا، بيتكرر كل سنة في نفس المعاد، الميزة السنة دي ان مفيش قمر يغلوش علينا الرؤية، كمان فيه خبراء بيقولو انو السنة دي هتبقا مميزة
يعني ايه برشاويات؟
دي نسبة للمكان اللي هتيجي منه الشهب، كوكبة برشاوس، المقاتل العظيم اللي انقذ اندروميدا من الوحش القاتل قيطس ، الحكاية بتاعت فيلم clash of titans
الزخات الشهابية شيء بديع ، سيبك من العالم تحت بغباؤه ، بقساوته ، بضغطه عليك، بترابه و عوادم سياراته و زحمته و حرارة طقسه ، و جرب تطلع للسما تبص عليها مع رفيق ..
- للإستزادة ممكن تتابع التقرير السماوي الشهري هنا: http://goo.gl/t8jztW
-
ش
دليلك لتأمل سماء الليل فوق المنطقة العربية، وأهم الأحداث الفلكية للشهر، وكذلك مراحل القمر مع بعض النصائح الرصدية للمبتدئين.
