14/10/2024
ازيكو يا أبطال♥رياضه اسبيشيال ♥عاملين اي♥✨
هتكلم معاكو فالبوست دا عن تعمل اي فالقسم بتاعنا دا فأول سنه و تاخد بالك من اي 🧐
و نبدأ بالمواد اكيد 👀
بصو بق اولا تحليل رياضى 1 اغلبها تفاضل ثالثة ثانوى من المواد الى بتحتاج مذاكرة لكنها سهلة و كويسة اوى و دكتور طلعت من الدكاترة المحترمة جدا و حقانى و كذلك دكتور عادل رشاد لو اداكم معاه فهو من الدكاترة الى بتبسط الدنيا اوى و امتحانه بيبقى اغلبه من الامتحانات السابقة... حلو؟!🌚
عندنا بق هندسة تحليلية 1 من المواد اللذيذة جدا جدا مع دكتور محمود عيسى ، الدكتور اصلا بيرفكت بجد من احسن الدكاترة الى هتقابلوهم فى الكلية تعاملا و شرحا و المادة كويسة مش صعبة خالص✨
و كمان عندنا جبر من المواد الكويسة برضو هى يمكن بترخم شوية فى الاخر لكن دكتور اشرف نوار بيهتم دائما بالسؤال كل محاضرة و المتابعة فالدنيا معاه بتبقى سهلة ، دكتور حمدى دا احسن دكتور شرحا دكتور بجد مجتهد جدا جدا هتفهموا منه كويس اوى هو اول مرة يمسكها بس دكتور حقانى و شرحه فوق الممتاز و كذلك لو حط امتحان بيبقى محتاج حد بيذاكر برضو 😂
أما بق اسس كيمياء فيزياء من المواد التقيلة علينا كقسم رياضيات عموما محدش بيحب الكيميا 😂🤡 لكن مع الاهتمام و المذاكرة اول بأول هتبقى كويسة ان شاء الله الحضور مهم و المتابعة مع الدكاترة لأنها مبقتش بنك و بتعتمد على حد مذاكر و فاهم كويس اوى فخلوا بالكم علشان اغلب الطلبة بتشيلها فنذاكر 😂🤌🏻 و فى قناة على التليجرام بتنزلها ملخصات كويسة تقدروا تذاكروا منها برضو
مقدمة فى برمجة بق المادة بتديكم اساسيات البرمجة بالنسبة ل لغة بايثون و دي لأول مره من سنين ، المادة محتاجة مذاكرة و اهتمام اوى مع دكتور عمرو مسعد لأن الدكتور بيتوسع و بيديكم اضافات عن المنهج الاساسي ، تقدروا تشوفوا يوتيوب و تذاكروا مع نفسكم المواضيع الى بتأخدوها فى المحاضرة و لازم تسمعوا كلام الدكتور و تتابعوا معاه.
تاريخ علم و دراسات بيئية من المواد السهلة جدا الى بترفع التقدير فدى مواد تتقفل خسارة تنقصوا فيها عموما
احصا من المواد الى مش بتنضاف بس نذاكرها حتى لو قبل الفاينل علشان تعدى على خير
جودة مش بتنضاف برضو ذاكروها قبل الامتحان بكام يوم هتعدوا ان شاء الله 😂
و بعد المواد بق نتكلم عن اللي بيدو المواد و اللي منهم المعيدين🌚
كل مادة على حسب هتنزل مع دكتور مين دا هتعرفوه فى اول او تانى محاضرة بيدخل الدكتور يحدد معاكم مواعيد السكاشن
المواد الى ليها سكاشن تحليل رياضى 1 ، هندسة تحليلية 1 ، جبر ، مقدمة فى برمجة
غياب السكشن و تسليم الشيتات مهم جدا للسكشن بيبقى عليه نص درجات السكشن فى الاغلب و كمان بيساعدكم فى الحل و التدريب على الى اخدتوه فى المحاضرة فحضور السكشن لا يقل اهمية عن المحاضرة بل قد يكون اهم
الحضور بالنسبالى كان مهم لأن كنت بتابع المادة حتى لو مذاكرتش بس كنت ببقى فاهمه الدنيا ماشية ازاى + الحضور ليكم مهم و كتابة المحاضرة ورا الدكتور و لما تروحوا انقلوها بشكل مبسط هتثبت حتى لو مذكرتوهاش يومها
فى دكاترة بتاخد غياب زى دكتور عادل رشاد ، د اشرف و د حمدى ، و دكاترة اسس بتأخد الغياب فى اى محاضرة و تعتمده للترم كله فأحظروا بقا 😂 ، دكتور عمرو بيأخد برضو بس هل هيعتمده ولا لأ دى على حسب هو عايز ايه لكن فى الاغلب مش بيعتمده اوى
تاريخ علم و دراسات الغياب ايامى مكنش مهم لكن جربوا الدكاترة برضو لو بيعتمدوا الغياب احضروا مش بيعتمدوا فمش مهم الحضور
حاجات واجب آخد بالى منها
1/ لو دكتور قال على جزئية مهمة او بتكرر اعرفوا انها جاية فى الامتحان و تتكتب جمبها مهم و تتذاكر
2/ المذاكرة حلو اوى للميد لأنه بيجمع درجات كويسة و بيبقى على جزء صغير تقدروا تذاكروه بسهولة
3/ امتحان الميد بيبقى صورة مصغرة للفاينل فنحاول نفهم الدكتور بيجيب الامتحان ازاى من الميد و نعوض فى الفاينل لو محلناش فيه و اغلب الدكاترة هترفعكم لو عوضتوا فى الفاينل (بس مش كلها لأن فى دكاترة لو جبت صفر فى الميد مش هيترفع 👈🏻👉🏻 )
4/ هتلاقوا صعوبة فى الاول لأن اغلب المواد بتبقى بالانجلش او كلها فعلى ما تتأقلموا على الوضع هتأخدوا وقت بس بعد كدا الدنيا هتمشي فمنقلقش فى الاول لو الدنيا مكنتش ظابطة اوى
5/ الامتحانات السابقة مهمة انك تفهم دماغ الدكتور فعلى الاقل تحلوا امتحان قبل الفاينل او الميد هتلاقوا فى الاغلب امتحانكم شبهه او نفس فكرته
اخطاء متعملهاش
1/ بلاش جدال مع الدكاترة تجانبا انكم تشيوا المادة 😂
2/ ياريت نفهم ازاى نذاكر صح لأن فى طلبة بأقل مجهود بتجيب اعلى من الى بيدح و دا ليه لأن واحد فهم دماغ الدكتور انه اركز على الجزئية دى و دى فدول هذاكر حلو اوى و الباقى هذاكره برضو بس مش زى دول فندخل الامتحان نلاقى الاجزاء دى فكدا هنجيب تقدير بأقل مجهود ممكن
3/ بلاش نسيب المواد للفاينل و نقول هنلمها مش كل المواد هتعرفوا تلموا و زنقة الكلاب و الصياح هيشتغل 😂
طب ازاى نذاكر صح
1/ بالنسبالى كنت بكتب المحاضرة ورا الدكتور و فى الاغلب مكنتش بلحق كله لأن اغلب الدكاترة بتشرح بسرعة بس على قد ما اقدر بكتب الى بعرفه و لما بروح بكتبها تانى بشكل كويس و كدا كانت بتثبت فى دماغى بنسبة 60٪ مثلا
2/ بسجل المحاضرة ريكورد بس فى دكاترة بتمنع دا فعلى حسب الدكتور سجلوا علشان ميحصلكمش مشاكل و كنت بسمع الريكورد تانى و انا بكتب المحاضرة و حقيقة بكتشف انى موقعة نص الملاحظات و حاجات مهمة وانا سرحانة باين 😂😂
3/ لو فى شيت يتحل و دا هيفرق جدا معاكم يمكن المعلومة هتثبت بنسبة 80٪ و تبقوا عملتوا الشيت بتاعكم برضو مش مزنوقيين قبل المحاضرة او السكشن ولا حاجة 😂
4/ يسلام بقا لو قريتوا المحاضرة الى فاتت قبل ما تدخلوا المحاضرة الجديدة كدا تبقوا عشرة من عشرة و نجمة
5/ اغلب الدكاترة بتجيب الامتحان من المحاضرات و الشيتات بس فأنت مش مضطرة تفتح الكتاب و تتوه فى بحر العلم و ترعب نفسك + يجى دور السكشن الى بيحلوا معاكم اسئلة الكتاب برضو و دا الى كنت بتكلم فيه انه حضور السكشن لا يقل اهمية من المحاضرة بل اهم علشان بنطبق و نتدرب على الاسئلة
بسكدا لما تيجوا تذاكروا بقا المحاضرات قبل الامتحان هتلاقوا الدنيا ابسط بكتير من انكم تقعدوا تدوروا هى فين و كدا و اكيد هتبقوا ناسيين شوية بس دا طبيعى حاولوا كل فترة تقرأوا المحاضرات تانى حتى لو قراية سريعة كدا للتذكر بس
و بس كد انتو كدا عرفتو كل تفاصيل القسم و بنتمنالكو كلنا التوفيق يا اولي جامعه😂♥
