07/05/2026
page mana amantaa keenyaa numti warri ortodoks tawaahidoo taanee waliif follow gochuu comment godhuu hin beeknu isaa biyya lafaa isa sirbaa fi isaa ol arrabsaa oolan isa wal qeeqa oluu sana follow gochuu maale Biraa Hin Darbinuu mee Kan Follow godha
Yeroo Muudamaa
Yoh. 21:15-17
Dubbisa: “laaqana erga nyaatanii booda Iyyasuus Simi’oon Pheexroosiin:- Yaa ilma Yoonaa Simi’oon isaan kana hunduma caalaa na jaalattaayii? Jedheen. Eyyeen Yaa Gooftaa akkan si jaaladhu ati beekta jedheen. Jabbiloota koo naaf bobbaasi jedheen. Irra deebidhaan lammaffaa:-Yaa ilma Yoonaa Simi’oon na jaalattaayii? jedheen. Eyyee Yaa Gooftaa akkan si jaaladhu ati beekta jedheen. Xabboootiwwan koo eegi jedheen. Yeroo sadaffaadhaafis Yaa ilma Yoonaa Simi’oon na jaalattaayii? jedheen. Sadaffaa, na jaalattaayii? Waan jedheniif Pheexroos gaddeetu:- Yaa Gooftaa ati hunda beekta. Akkan si jaaladhu ati beekta jedheen. Iyyasuusiis:-hoolota koo bobbaasi jedheen. “
🖊️ YAA ILMA YOONAA SIMI’OON ISAAN KANA CAALAA NA JAALATTAAYII? Lakk. 15
Akkuma kana dura yaadattan gooftaan keenya Pheexroosiin “kana booda nama kan kiyyeessitu taata “ (Mat.4:19, Mar.1:17, Luq. 5:10) jedheenii ture. “Furtuuwwan mootummaa samiiwwanii siifan kenna.” (Mat.16:19) jedheenii ture.
Pheexroos itti gaafatamummaawwan kanneen erga baatee booda, gara doonii fi kiyyoo duraaniitti ’uu isaa ilaalee jechuunii isaati.
Furtuu lafaafi samii irratti aangoo qabu fannoo, aangoo lubummaa, duuka bu’ummaa… dhiistee maaliif galaaana Xibriyaadoos yaadda? Maaliif hojii dur dhiisi jedhamtee ajajamte qurxummii qabuudhaaf ajaja gooftaa dubatti jetta? jedhee akeekkachiisuu isaati.
Akkuma duuka bu’aa kamiitti otoo hin ta’iin, bifa duuka bu’oota biroo irraa adda ta’een na jaalattaa? jedheeti kan inni Pheexroos gaafate. Furtuu mootummaa samii ittiin banan kanan kenne si’iifi; maaliif furtuu qabattee qurxummii kiyyeessutti deebitaa? jechuuniisaati.
🖊️ EYYEE YAA GOOFTAA AKKAN SI JAALADHU ATI BEEKTA. Lakk.15
Amma akkuma qalbeeffattan qulqulluu Pheexroos beekumsa Iyyasuuus Kiristoosiif kenne. Ana caala laphee koo ati beekta jechuunii isaati. Jechi of tuulummaa kana dura dubbachaa/dubbatee ture akka isa hin baasne hubateera. “Hundumtuu yoo sitti dogoggoran, ani goonkumayyuu sitti hin dogoggoru.” (Mat.26:33) “lubbuu kooyyuu siifan kenna.” (Yoh.13:37) jedhee dubbachaa kan ture jechoota kana otoo hin raawwatin hafuusaa ni beeka. Halkan tokkotti Si’a sadi garuu isaas ni yaadata.
🖊️ SADAFFAA NA JAALATTAAYII? WAAN JEDHEENIIF PHEEXROOS NI GADDE. Lakk. 17
Gooftaan keenya Pheexroos ala sadi gaafate. Sadaffaarratti ni gadde. Gaafichi ganiimsa si’a sadii wajjiin kan wal qabate ta’aa laata? jedhee waan yaadeef gadde. Pheexroos, “Yaa gooftaa hundumaa ati ni beekta.” jedhe. Ati keessa koo ni madaalta, jabina jaalala koo ni safarta jechuunii isaati.
HOOLOTA KOO BOBBAASI
Bobbaasuun abbummaa, itti gaafatamummaa, hangafummaa agarsiisa. Itti gaafatamaa, hangafa duuka bu’oota hundumaa taasise jechuudha. Itti gaafatamummaa kanas erga fudhatee booda gaafiwwan dhufan hundumaaf adda durummaadhaan yeroo deebii deebisu arganna. (H.D.B 2:14-36, 3:12-26, 4:8-20, 5:29)
🖊️ Hiikoon simaa keenya akka jedhutti: jabbiloota kan jedhaman duuka bu’oota kurnan, xabbootiwwan kan jedhaman gargaaartota torbaatamii lamman, hoolota kan jedhaman dubartoota qulqulloota soddomii jahan akka ta’anii fi yeroodhaaf isaan kanneen irratti Pheexroos muuduu ibsa.
Pheexroos erga ganee booda muuduu isaas yeroo ibsu “inquu suphee keessatti kufe qulqulleessanii, dhiqanii iddoo isaa akka teessisan” jechuudhaan waliin madaalchisee ibsa.
🖊️ Hiikoon simaa gi’iizii gara gi’iizii immoo “Yoo na jaalatte, amantootatti seera koo himi, baruumsa koo barsiisi, mucummaa akka argatan taasisi.” yeroo jedhuunidha jedhamee hiikameera.
Waan dhageenyeen nu haa jiraachusu. Qalbeeffannaa nuuf gaa dabalu.
Xumurameera!
29/08/2018 B.A
Finfinnee, Itiyoophiyaa
