MIZORAM UPC

MIZORAMA UPC A LO PIAN DAN




Thlarau Thianghlim hnathawh a thleng
A.D 30 vela Pentecost ni a Lal Isua zirtirte chunga Thlarau Thianghlim, \awnghriatlohte nena nasa taka a lo thleng ang mai khan, kum 1930 vela Mizorama Thlarau Thianghlim hnathawh lo thleng changtute chuan, taksa chetna, khurh hlawk hlawkna te leh \awnghriatlohva \awngna te an dawng ta zel a. Chu harhna hnathawh lo thleng chu Miz

oram a kohhran hmasa, hmar lam kohhran Presbyterian Church leh chhim lam kohhran Baptist Church te chuan Thlarau Thianghlim hnathawhah an pawm tel thei lo va, Aizawl Bawrhsap hovin tihrem an tum ta a. R.K.Vanrambeiseia, kum 92, Kawnpui khua chuan ti hian a sawi, “Kum 1935-ah khan Kawnpui khaw hlui Presbyterian Church biak ina ka lam lai chu Upa Malsawma’n min pawt chhuak a, Bawrhsap thupek angin Salam Rs 5/- min chawitir a. Tin, Kawnpui khuaah Tlangau chu hetiang hian tlang an autir a - ‘Lal Mangkhaia khua Vandawt (tuna Khamrang khua ni ta hi) a thlarau lam pur chaw a kal chu Salam Rs.5/- chawitir an ni ang,” tiin2 . Hetih hun lai hian Mizoram hmun hrang hrangah Thlarau Thianghlim changtuten harsatna chi hrang hrang an tawk nasa hle. Thlarau Thianghlim chungchanga inhnialna
Kum 1935-ah Presbyterian Church Standing Committee chuan Mizorama Thlarau Thianghlim hnathawh chi hrang hrang - taksa chetna te, vanzai (\awnghriatloh) te, hlimna rawngkai chi reng reng tihrem tumna thuchhuah a siam a. Kum 1937 a Presbyterian Church Assembly, Durtlanga an neih \umin Standing Committee thuchhuah hi an chai nawn leh a. He mi \um hian 1935 a Sialsuk Presbyterian khawmpui a Upa atana an nemngheh Upa Zakamlova chuan, hlimna changtute thlavang nasa taka a hauh tak avangin hlimna duhtute leh kohhran hruaitute inkarah inhnialna nasa tak a chhuak a. Heta \ang hian Upa Zakamlova thinlungah hian Mihlim Pawl din duhna a lo awm ta niin a lang. Mihlimho an lengkhawm
Kum 1937 September ni 24 zanah chuan Upa Zakamlova hovin ama in Aijal (Aizawl) ah mihlimho chu an lengkhawm ta a. Dipdaltu awm lo va anmahni chauhva an han lengkhawm chu nuam an tiin, an thawmte pawh a nasa hle ni tur a ni, Welsh Presbyterian Missionary-te chuan Aijal Bawrhsap A.G.Mc Call (Pawnpuite sap) hnenah Upa Zakamlova hova lengkhawmho chu titawp turin an thlen a. Aijal Bawrhsap chuan Upa Zakamlova chu kovin, an lenkhawm zui zel chuan a in chu \hiahsak a nih tur thu leh, amah pawh Aijal a\anga mel 50 a hla a hnawhchhuah hial turin a vau ta a. Mihlimho chu an lengkhawm zui ngam ta lo a ni. Rev.E.L.Scisma‘n, a lehkhabu ziah ‘India’s Calling,’ P.86-a a tarlan dan chuan, Aijal Bawrhsap hian Upa Zakamlova in hi a \hiahsak ta lo va, Rs 100/- chawi tur a tih a ni a. Hei pawh hi Upa Zakamlovan Aijal Bawrhsap hnenah, mihlim an nih avanga Rs 100/- an chawina Receipt fel tak pe tura a ngen ve tlat avangin, Rs 100/- pawh hi a chawi leh lo a ni. Upa Zakamlova hi kum 1937-1938-ah hian Thlarau Thianghlim hnathawh avangin Aijal Bawrhsap hmaa ding turin vawi sawm lai koh a ni3 . Mihlim chhantu tur Missionary zawn thu
Kum 1937 September thla tir lamah chuan, Upa Zakamlova leh Pu Vanchhunga leh Pu Siamliana te chu Bihar State-ah hlimna pawmtu missionary zawng turin an kal a. Hmuh an zuk tum tak Missionary chu chawlh lain an ram lamah a hawn lai a lo ni si a, an tum angin an hlawhtling ta lo. Calcutta-ah Assemblies of God Kohhran hruaitu Rev J.H.Boyce-a hmu turin an kal leh a, remchang takin an zu hmu thei ta hlauh mai a. Assemblies of God (A.G) leh Mizoram a mihlimhote chu thawkho turin an inbe thlu thei ta a. Aijal-ah an lo hawng a, chanchinbuah heti hian an chhuah ta a, “Ni 7 Sept. 1937 ah America kohhran Assemblies of God leh Mizoram Mihlim Pawl te chu thawkho turin an inbe tlu ta e,” tiin. Chanchinbua an thuchhuah hi Aijal Bawrhsap A.G.Mc Call (Pawnpuite Sap) chuan a lo hriat veleh, 1937 October thlaah Lushai Hills (Mizoram) ah missionary dang lo luh phal lohna dan a tichhuak leh ta a. Upa Zakamlova leh a \hianten missionary an zawnna chu a kawng a lo tawp ta a.4

Upa Zakamlova Sipai-ah a \ang
Welsh missionary leh Bawrhsap \angrualin Mihlim Kohhran din an phal tak tlat si lo vah chuan, Upa Zakamlova pawh chu 1942-ah Indopui 2-naah sipaia \ang turin a kal ve ta a. Sipaia a kal dawn hian hetiang hian a \awng\ai a - “Lalpa, indonaah hian hnehna changa Mizoram min hruai thlen leh chuan, van indona ka bei leh ang,” tiin. Sipaiah hian Warrant Officer, IMD hna a chelh a ni. Upa Zakamlova hian sipaia a \an lai pawh hian Mihlim Pawl din hi a thinlungah a thi thei tak tak lo va. sipaia a \an lai hian Calcutta-ah Assemblies of God Field Superintendent Rev M.L.Ketchem-a a hmu fuh hlauh mai a. Ani nen hian indo zawh hunah Mizorama kohhran din turin an inbe thlu leh ta a. 1945-ah Indopui a lo tawp a, dam takin a lo hawng leh ta a, Mizoramah van indona chu a \an \ha leh ta a ni. Upa Zakamlova Pastor-ah a \ang
Kum 1947-ah chuan Assemblies of God Kohhran chuan Upa Zakamlova chu Pastor-ah thla khat a Rs.60/- hlawh turin an la ta a. Assemblies of God hruaitute - Rev M.L.Ketchem, Rev. Shoemaker-a te chu Aijalah an lo chhuak a. Assemblies of God Kohhran hi National Christian Council of India-ah an lo tel bawk si nen, Welsh missionary te chuan, “Lushai hills (Mizoram) chu kan field a ni a, chuvangin kohhran dinin Mizoramah rawng in bawl thei lo vang,” an lo ti a. Assemblies of God Kohhran pawh chuan Pastor Zakamlova an rawihna chu titawpin an hawnsan leh ta a. A.G Kohhranah hian Pu Zakamlova hian Pastor hna hi a thawk rei ta lo a ni.5

Mizoramah hlimna pawm kohhran a ding ta
Welsh missionary ten Western culture mila kohhran an din huang chhungah chuan Thlarau Thianghlim hnathawh, Mizo culture mila khuang nena zaia lamna leh, \awnghriatlohva \awngnate chuan hmun a chan ve phak loh avang chuan, Zoram hmun hrang hrangah missionary te kohhran dina leng lo nia inhria, lengkhawm pawl an awm hrang ta thluah mai a. Hetih hun lai hian Chhura Chengkek lawh tum an sawi ang maiin, Sap missionary tel lo va kohhran hi din theih loh tura ngaih tlatna a awm bawk si nen, Pu Zakamlova te lah chuan Sap missionary zawm tur mumal tak an hmu thei si lo nen, a buaithlak hle ni tur a ni. Mahse Lalpa hian Mizoramah hian a Thlarau Thianghlim chauh hmachhuantu hlimna pawm kohhran hi din a lo tum a ni ang e, ti te pawhin a ngaihtuah theih a ni. Kum 1948 August ni 11-ah Aizawl Dawrpui M.E.School-ah Pu Zakamlova -Aizawl, Pu Lalhema- Aizawl, Upa Thanglula -Dawrpui, Upa Zakaithanga -Aiduzawl, Pu Thanthuama -Khuangthing, Pu Thinlaihnema -Hualtu khua, Pu Lianpuichhinga -Khawrihnim khua te kalkhawm chuan Pathian Thlarau Thianghlim thiltihtheihna chauh hmachhuanin, ‘Hlimna pawm kohhran’ hi an din ta a ni. Pu Zakamlova chu Chairman (hotupa ber) ah an hmang a, ‘Sap missionary, sum leh paia \anpui theitu tur lo zawng se,’ an ti bawk a. Mizoram a Mihlim Pawl, ina lo inkhawm hrang, hmun hrang hranga mite chu zawng chhuakin an inzawm khawm zel a. Hei hi missionary te din ni lo, kohhran pawl mumal taka Mizorama a lo din \anna chu niin a lang. He hlimna pawm kohhran hi pawn lam mite koh dan chuan Pa Pawl an ti a, an \awngtai bul \annaah ‘Aw Lalpa’ ti lo va ‘Ka pa’ ti mai \hinte an awm vang niin a lang. Tin, Pa Pawl tih hi a hun laia mihlimte an hmuhsitna \awngkam a ni ve hrim hrim bawk a ni.6

Apostolic Kohhran an ni ta
Kum 1948 August ni 11-a hlimna pawm kohhran ding tharten thuneihna an pek angin, Pu Zakamlova chuan America (USA) a Apostolic Church ho General Bishop, Blankenship-a chu lehkhain a zu dawr pawp ta a. General Bishop Blankenship-a pawhin sum leh paiin \anpui thei lo mah se, Mizoram a hlimna pawm kohhran chu thawhpui an duh thu a rawn hrilh a. Sum leh paiin rawn \anpui thei dawn lo pawh ni se, Apostolic Church Bishop Blankenship-an thawhho a duh thu Pu Zakamlova lehkhaa a rawn hrilh hi an lawm hle a, “Tunah chuan Sap missionary thawhpui tur kan hmu ta, kan kohhran hming pawh Apostolic Church (Apostolic Kohhran ti a ziah a ni bawk) a ni ta,” an ti a, an hlim ta hle a. Pu Zakamlova chuan amah bakah a \hiante pathum – Pu Zakaithanga, Pu Thanthuama, Pu Thinlaihnema te tana rawngbawl theihna Licence dilna chu, Apostolic Church General Bishop Blankenship-a hnenah a zu thawn ta a ni. Pu Zakamlova chu 1948 October thlaah Lungleng Vawkzawnah a kal a, Apostolic Kohhran chu a din a. N. Lunglengah phei lehin, Apostolic Kohhran chu a din leh a. N.Lunglengah hian biak in an sa nghal a, he biak in hi Mizorama Apostolic Kohhran biak in ding hmasa ber a ni awm e. Kum1948 November thla hian Pu Zakamlova hi mihlimho hruaiin Khawrihnimah a kal a, Apostolic Kohhran chu a din leh a. Heng khaw thumte hi Apostolic Kohhran hming pua Mizoram a kohhran dinna hmasa berte chu an ni 7 . Mizoramah Roxie AR Telie Dover-i
Pu Zakamlova chuan Sap missionary zawm tur dang a la zawng reng tho va. Pentecostal Assemblies of the World Missionary, Mother Dorothy Mc Carty, Bhagalpur, India a mi chu a thi tawh tih hre lovin lehkha a zu thawn ta a. Pu Zakamlova‘n Mc Carty lehkha a zuk thawn chu a hmun ruak lo luahtu Roxie A.R.Telie Doveri chuan a lo hmu a. Pu Zakamlova chu hetiang hian lehkha a thawn let ve leh ta a. “Mother Mc Carty chu kum kal ta khan a thi tawh a, tunah hian Pi Aretha Schryer-i a awm a, ani pawh pension tura haw mai tur a ni a, kei hi Pentecostal Assemblies of the World tirha lo kal ka ni a, nangmahni pui tur chuan ka lo kal ngei ang,” tiin8 . Roxie A.R.Telie Dover-i (Doveri tiin kan sawi tawh ang) hi America (USA) a Pentecostal Assemblies of the World Kohhran tirha India hmar lam Bhagalpur hmuna a awm lai hian, amah ruaitu P.A.W Kohhran te hian harsatna an tawh tak avangin an ruai chhunzawm thei ta lo va. Doveri pawh chu P.A.W Kohhranah chuan a awm zui zel ta bik lo va, USA a Pathian pakhat chauh ringtu tho, Apostolic Church General Bishop Blankenship-a, Texas a mi leh, Rev. Caro Davis-a, Canada a mite chuan sum leh pai pein an chhawr zui ta a9 . India hmar Bhagalpur-ah chuan missionary hna chu a thawk chhunzawm ta tho va. Pu Zakamlova leh Apostolic Church General Bishop Blankenship te chuan, sawi tawh angin, hetih hun lai hian lehkhate inthawn tawnin a thuin an lo inzawm tawh a. Pu Zakamlova sawmna angin Apostolic Church General Bishop Blankenship-a tirhin Doveri chu India hmar Bhagalpur a\angin Mizoramah a lo kal ta a. 1949 January ni 16 ah Aizawl a lo thleng a. Pu Zakamlova kaihhruai Apostolic Kohhran ti a lo invuahho chuan an lo lawm a, “Kan missionary a lo thleng ta,” an ti a. Pu Zakamlova’n Rev Blankenship-a hnena a lo zu dil tawh angin, Doveri hian Pu Zakamlova - Aizawl, Pu Zakaithanga - Aiduzawl, Pu Thanthuama – Khuangthing, Pu Thinlaihnema - Hualtu te chu Apostolic Kohhrana rawngbawl theihna Licence chu Rev Blankenshipa hmingin a pe ta a10 . Missionary Doveri
Mizoram mihlim pawl chhantu
Missionary Doveri’n Aizawl a lo thleng chu Mihlim Kohhranho chuan an lawm hle ni tur a ni, Mizoram hmun hrang hrang a\angin amah hmu turin an lo kal khawm a. Apostolic Kohhran khawmpui an hmang a ni ta ber awm e. Ni sawm chhung zawng hun an hmang a ni8 . Missionary Doveri chuan Pu Zakamlova kaihhruai mihlimho hnenah chuan, “Engnge tihsak che u ila in duh?” tiin a zawt a, anni chuan, “District Superintendent (Assistant Governor) hnenah Mihlim Kohhran din phalna min dilsak la, kan hotuah \ang bawk rawh,” tiin an ngen chiam a. An ngenna ang chuan Doveri chuan Aizawl District Superintendent hnenah dilna lo ziak turin Pu Zakamlova chu a ruat a. Pu Zakamlova chuan dilna a ziah zawh vek hnuah Doveri chuan a hming a sign thlap a. Tin, a lehkha pawimawh Oklahoma City University a\anga B.A degree te, BTh degree te, Oklahoma State School Teacher’s Certificate te, Tulsa Oklahoma a Apostolic College a\anga Diploma Certificate te, Southern Bible and Vocation College, Rising State, Taxas Tenesse (Methodist University) a\anga Master degree a lo neih te leh, a Ordination Rev W.T. Witherspoon leh Rev C.P.Williams ten an lo pekte chu thil telin, Aizawl District Superintendent hnenah chuan an thehlut ta a11 . Hetianga Mizorama \awnghriatlohva \awng \hin mihlim kohhran din hran tuma Sap missionary lo kal tharin dilna an thehlut ta mai hi, Mizoram a Welsh missionary lo awm hmasa 12 ten an lo hriatin, dal an chak hle mai a. Nimahsela, Apostolic Church kha National Christian Council-ah an tel ve loh avang leh, thurin hran daih nei an nih avangin khap theihna an nei ta si lo va. Doveri chu chaw eipuina neiin Mizoramah Pentecost Kohhran din lo va, mihlim hote pawh chu Prebyterian Kohhrana hruai kir leh turin an ngen chiam a. Nimahsela Doveri chuan Welsh Missionary 12 te ngenna chu, “Ka ti thei lo vang,” a ti ta tlat a. Aizawl District Superintendent pawhin Doveri chu kovin, a hnenah, “Mizorama mihlimho \awnghriatlohva \awng \hin hote hian missionary 12 te pawh zui duh lovin, biak in pawh nei lovin an vak mai mai a ni a, nang pawh hi an zui rei duh lo vang che, mihlim kohhran chu din tum lo mai rawh,” tiin a thlem chiam a. Doveri chuan, “Welsh missionary 12 te hi \awnghriatlohvin an \awng ngai lo va, Thlarau Thianghlim hnathawh, Isua hming tihdamna te an pawm lo va, heng mihlimho hian an zui duh lo a ni. Kei chu \awnghriatlohvin ka \awng a, Isua hminga tihdamna ka pawm a, chuvangin kei chu min zui zel ang,” tiin a \an ve tlat avangin, Aizawl District Superintendent (Bawrhsap) chuan Apostolic Kohhran din phalna chu a pe ta a ni. Thurin chungchanga inbiakremna
Doveri lo kal hma hi chuan, Pu Zakamlova kaihhruai hoten ‘Apostolic Kohhran’ lo invuah ve mah se, Trinity ringtute vek an ni a. USA a Apostolic Church chu an thawhpui dawn chuan Apostolic Church thurin chu an pawm a \ul thu chu Doveri chuan a hrilh ta a. Tichuan, a sawi ang chuan USA lama Apostolic Kohhran te thurin ‘Pathian Pakhat chauh a awm a, A hming chu Isua Krista a ni tih leh, sual ngaihdam nana tuia Isua Krista hminga inhnimphum baptisma te leh, Thlarauvin a \awngtir ang zela \awnghriatlova \awng theihna tela Thlarau Thianghlim baptisma te’ chu an lo pawm ve ta a. Doveri hi Mizorama Isua Krista Pathianna famkim leh Isua hming baptisma chan thu hril hmasa bertu a lo ni ta a ni12 . Isua Krista hminga Baptisma
inchantirna hmasa ber
Aizawl District Superintendent-in kohhran din phalna a pek hnuah, kohhran thurin turte siam fel a lo nih tak zelah chuan, kohhran chu mumal deuhva siam a lo \ul ta zel a. Doveri chuan Pu Zakamlova hnenah, “Hmeichhia ina baptisma chantir i hreh em?” tiin a zawt a. Pu Zakamlova chuan, “Hreh lo ve,” tiin a chhang a. Tichuan, ni 26 January 1949 zing dar 6 ah chuan Aizawl Varak dil (tuna Aizawl Tennis Court-a an hman takah hian) missionary Doveri chuan Pu Zakamlova chu Isua Krista hmingin tuia hnimphum baptisma chu a chantir ta a. Hei hi Mizoram a Isua Krista hminga baptisma inchan tirna hmasa ber a ni13 . Heta \ang hi chuan Pu Zakamlova leh a thawhpui - Zakaithanga, Thanthuama leh Thinlaihnema te pali chuan Pastor nihna Licence an neih avangin Isua hminga baptisma chantir theihna hi an nei ve ta a. Varak dilah hian Pastor Zakamlova chuan mi dangte chu Isua hmingin baptisma a chantir ve ta a, Mizo pa, Isua hminga baptisma chantirtu hmasa ber a ni. Kum1951-ah Varak dilah bawk hian, “Aw khawngaihtu Pathianin” tih hla phuahtu, Pu Chawngkhupa pawhin Isua hminga baptisma hi chang vein, a uithak pân pawh a dam vek nghe nghe a ni14 . Missionary Doveri‘n UPC zawm
turin thurawn a pe
Missionary Doveri hova kohhran mumal deuhva an han siam fel takah chuan, Mizoramah Thlarau Thianghlim changtu, \awnghriatlova \awngna dawng mihlimho tam tak an awm a ni tih chu Doveri pawh chuan a hre ta a. USA lamah Apostolic Church chu kohhran tereuhte an nih avangin sum leh pai lamah an \anpui zui thei dawn lo va a hriat avangin Doveri chuan Pu Zakamlova hnenah, “India ramah hian UPC missionary Rev. E.L.Scism-a a lo kal dawn a, chu chu zawm ta mai ula, thurinah pawh Apostolic Kohhran nen an inang thlap tho va, sum leh pai lamah pawh Apostolic Kohhran ai chuan an \anpui thei zawk ang che u. Kei pawh UPC ah chuan awm ve mai pawh ka hnial lo ve,” tiin thurawn a pe ta a. Pu Zakamlova ho chu an phur hle a15 . UPC zawm turin thu an ti tlu ta
Missionary Dover-i’n Aizawl a lo thlen a, Aizawl Bawrsap (Superintendent) in kohhran din phalna a pek tak chinah khan, Missionary Doveri kaihhruaina hnuaiah Apostolic Kohhran chu din ngheh tak tak a lo ni ta a. Pu Zakamlova chu District Pastor-ah hmangin, Zakaithanga, Thanthuama leh Thinlaihnema te chu Apostolic Kohhran Pastor nihna Licence pek fel an ni nghal bawk a.16 Kum 1949 March thlaah khan Apostolic Kohhran chuan Lungleng Vawkzawn khuaah khawmpui an nei ta a. He khawmpuiah hian Than\huama - Khuangthing, Pastor nihna Licence lo nei tawh chu a kal lo va. Ni 12 March 1949 ni khan Pu Thangsavunga inah rorelna an nei a. Hemi \um hian Misionary Doveri thurawn pek anga UPC zawm an duh leh duh loh chu ngaihtuahna an nei ta a. Doveri thurawn pek anga UPC zawm chu \ha an ti tlang a, United Pentecostal Church chu zawm turin thu chu an titlu ta a.15 Lunglenga 1948 kuma biak in an lo sak pawh chu ‘UPC biak in a ni ta’ an ti a. Lungleng biak ina “UPC biak in hmasa ber Dt. 3.3.49” tih intar \hin pawh kha, Vawkzawn khawmpuia UPC zawm an tih tluk tak avanga tar mai an nih a rinawm e. Mahse hemi \um hi chuan UPC zawmna tak tak an la nei lo va, UPC zawm turin thu tlukna an siam mai chauh a la ni, Apostolic Kohhran an la ni zel rih a ni.17

United Pentecostal Church an ni ta
Missionary Doveri pawh chu Mizoram chhuahsanin, India hmar Bhagalpur UP ah chuan a rawngbawlna chhunzawm turin a haw thla ve leh ta a. USA a UPC te pawh chuan, India rama Missionary hnathawk turin Rev. Ellis Scism-a te chhungkua pawh chu an lo thlang fel tawh bawk a. 1949 February ni 3-ah chuan an chhungkuain America hmar tawp, Washington State lawngchawlhna hmunpui ‘Seatle’ ah India rama kal turin an lo vai liam ve mek bawk a. Rev. E.L.Scism-a te chhungkua hi kawng laka ni 55 an rawn thang hnuin, dam takin ni 26 March 1949-ah chuan India ram Madras lawngchawlhna chu an lo thleng a. India chhim lam Kodaikanal-ah awmhmun bengbelin rawngbawlna a \an ve ta a. Rev E.L.Scism-a hi Superintendent, UPC of India & Ceylon hna pek a ni. 18
Missionary Doveri leh Rev E.L. Scism-a te hi India chhim leh hmar a awm mel sangkhat vel kar dana awm an nih avangin an inhmu lawk lo va. Doveri chuan Rev E.L.Scism-a chu lehkha thawnin, Mizorama kal tur leh, chuta Apostolic Kohhran chu UPC zawm zawk tura thurawn a pek thute a hrilh a. Rev E.L. Scism-a chu Doveri sawmna angin a awmna India chhim Kodaikanal a\ang chuan Mizorama kal turin ni 23 January 1950-ah a chhuak \an a, Mizorama kal tura sawmtu Missionary Doveri awmna, India hmar Bhagalpur, UP chu a pan ta a. Bhagalpur U.P a\ang hian Doveri leh Nathanael Parmer-a te nen Mizoram hi an panho ta a ni. Hemi hma hian Rev E.L.Scism-a leh Dover-i hi an la inhmu ngai lo a ni.19

Missionary Dover-i sawmna anga Rev.E.L.Scism-a leh Missionary Doveri ten Mizoram an lo thlen ni chiah hi chiang taka hriat ni lo mah se, 1950 February ni 18 (Inrinni) ni a pawm a ni. Tichuan ruahmanna lo awm tawh sa angin Rev Zakamlova kohhran din, Apostolic Church, Missionary Dover-in Pathian pakhat chauh pawmtute thurin a lo pawm tir tawhte chu, Doveri thurawn angin 1950 February ni 19 Sunday niin Rev E.L.Scisma chuan United Pentecostal Church-ah chuan a lawm lut ta a ni. Kum 1950 February ni 19 (Sunday) hi Mizorama UPC lo pian \anna ni a pawm a ni ta a ni.20

Mizorama UPC a lo din chhuah dan dik tak chu Pu Zakamlova’n tha leh zung tam tak leh tawrhna nasa tak nen mihlim kohhran a din a, an kohhran hmingah Apostolic Kohhran an inti a, an kohhran thurin hi Missionary Dover-in a duan sak bakah, a thurawn angin UPC-ah Rev E.L. Scism-an a lawm lut a ni. A nihna takah chuan Pu Zakamlova’n kohhran a din a, a kohhran Quarters luah laiah an inkhawm ta a. Rev R.Thangliana lam, Headquarters-a lawi mi tlemte te chu Thakthing Venga Pi Lalrinawmi inah an inkhawm ta a, a hnu deuh vah Rev R.Thangliana Quarter-ah an inkhawm ve leh ta a. 1984 kuma N.Mizoram District UPC Headquarter biak in an hawn, a hun laia Aizawla biak in mawi leh \haa sawi tling ve chu Dt. 8 September, 1995 a\ang chuan Puithiam Rev R.Thangliana remtihna leh duhthusam ang ngeia kalha awmin, luahtu awm lovin lainatawm takin a \hing ta thup mai a ni. Pathianin engtin tak ngai ang maw! Mizoram District Rev Chhunglawma
kaihhruai District Board Committee chu
Dt. 12 September, 1995 ni a Rev Chhunglawma kaihhruaiten NEI UPC an thawhpuina titawpa N.Mizoram Unit a hrana ding tura thu an tihtluk lai khan, sawi tawh angin Mizoram UPC chu Aizawl Chaltlangah Office hawngin Pastor bial 14 lai neiin mumal takin a lo kal hman tawh a. Chutih lai chuan Rev Chhunglawma kaihhruai N.Mizoram Unit-a inlahrang ho zingah khan Mizoram UPC nena thawhho thuai duh an lo awm bawk nen, Rev Chhunglawma chuan District Board kohva, an kal zel dan tur chu rel fel thuai \hain a hre ta a, Dt. 14 September, 1995 ah chuan District Board a ko ta a. Chuta an thurelte chu a ngai ngaiin lo tarlang ila:

A hmun: Upa Lalnunmawi In, Bungkawn
A hun: Dt. 14.09.1995 (Thursday)
Member kalte :
1) Rev Chhunglawma, District Superintendent
2) Rev Ngurthanpara Sailo, District Secretary
3) Rev Zaikunga, Dinthar bialtu
4) Rev Vankhuma, Durtlang bialtu
5) Rev Sairuma, Kawrthah bialtu
6) Rev Vanlalfela Sailo, Kawnpui bialtu
7) Pastor Lalthanmawia, Bukpui bialtu
8) Pastor C.Zathanga, Sairang bialtu
9) Pastor H.T.Lalengmawia, Mamit bialtu
10) Pastor Laldawngliana, Bilkhawthliar bialtu
11) Pastor Lalhmangaiha (Hmatea), Bairabi bialtu
12) Pastor F.Lalnimawia, Lengpui bialtu
13) Pastor Lalchhawnthanga, W.Phaileng bialtu (ani hi a hmanhmawh fal deuh avanga Mizoram UPC zawm tawh Rev Chhunglawma lama tel ve leh a ni)

Rorel \an hmain Chairman-in Pastor Lalchhawnthanga \awng\aia hun min hawnsak turin a sawm a, rorel \an nghal a ni. RORELTE

1. STAFF TE LEH EVANGELIST TEACHER TE THU. Kohhranten harsatna kan tawh tak avangin kan Staff te leh ramthim field-a thawktuten harsatna an tawk nasa hle a; engtin nge kan en kan enkawl zui ang ? tih sawihona kan nei a. Engpawhnisela Mizoram UPC ten nena inbiakna kan neihnaah an chungchang thu te chu sawi ila a \ha kan ti

2. MIZORAM UPC TE NENA INBIAKNA THU
Mizoram UPC te nena kan inbiak turah hian condition fel tak siama inbiak ni se, chuta inbiaknaah chuan inzawmkhawm thuai a \hat leh \hat loh thute sawi ni se. Tin, hengte hi sawihona neih ni se:
1) Inzawmkhawm dan tur.
2) Administration thu
3) Office Staff te leh Evangilist Teacher thu.
4) Sum leh pai thu
5) Khawmpui thu
6) Rawngbawlna thuah.
3. DISTRICT SUB-COMMITTEE DIN THU
Emergency a awm thulhah District Board inkoh a harsa \hin si a, chuvangin tun hun atan chuan District Sub-Committee din ni se kan ti. Chungte chu:

1. Chairman - Rev Chhunglawma District Superintendent
2. Secretary - Rev Ngurthanpara Sailo District Secretary
3. Member te - Upa Lalnunmawia
Upa H. Zirliana
Bro P.C.Rotuama LcH, Headqurter
Upa Lalrothanga, Goverment Complex
Upa Lalrinmawia, Tuikual
Bro. C.Lalringliana LcH, Chawlhhmun
Bro. Saihranga Sailo LcH, Dinthar
Rev Zaikunga, Dinthar
Rev Vanlalfela, Kawnpui

Tin, he District Sub-Committee te hian a lo \ul ta thut a nih leh Office te lo hawng se, tin, rawngbawltute pawh a \ul chuan lo la mai se a \ha kan ti.

4. REV HARRY E.SCISM HNENA LEHKHATHAWN THU
Tun kan buaina thute hi chiang takin Rev Harry E.Scism hnenah hriattirin lehkha thawn ve ila, thil awm dante chiang takin hrilh ila. Chung vel lo buaipui tur chuan Rev Zaikunga leh Rev Vanlalfela Sailo te ruat an ni.

5. CIRCULAR THU:
Kan District harsatna thute hi khaw tina Kohhranhote hriat turin Circular siam ni se, chu Circular buaipui tur chuan Pastor R. Laldawngliana ruat a ni.
6. NGENNA THU:
Hetianga North East India atanga kan lo inlakhranna thua kan rawngbawlpuite tuna min la zui ve thei rih lote hnenah hian min rawn zui ve theih leh theih lohte ziak ngeiin zawh ni se. Dt. 15.10.1995 ral hma ngeiin ziak ngeiin District Secretary/District Superintendent hnenah rawn hawn se, chu lehkha tur chu District Secretary-in lo buaipui se.

7. PUBLICITY CELL DIN THU:
Kohhran ten harsatna kan tawh chungchangah thu leh hla tam zawk chhuah \ha kan ti a, a \ul anga lo buaipui turin heng mite hi ruat an ni:-
1.Bro. Lalthantluanga- Chairman
2.Bro. R.Lallawmzuala-Secretary
3 Bro. C.Liansanga
4 Bro. Lalnienga
5 Bro. H.Lalrinmawia
6 Bro.P.C.Lalramzauva

Kan rorelte tluang taka kan zawh hnuin Rev Zaikungan tawngtainain kan hun a titawp ta a ni. Sd/- Sd/-
REV CHHUNGLAWMA REV NGURTHANPARA
Chairman Secretary
United Pentecostal Church N.Mizoram District

Rev Chhunglawma kaihhruaite hian an rorel No.3 na bawhzuiin Tuikhuahtlanga Rev Chhunglawma Quarters-ah Office te hawngin hun an hmang chho ta a, anRorel No.7 bawhzuiin Circular pawh hetiang hian an chhuah ta a. Thlarau Thianghlim hnathawh a thleng
A.D 30 vela Pentecost ni a Lal Isua zirtirte chunga Thlarau Thianghlim, \awnghriatlohte nena nasa taka a lo thleng ang mai khan, kum 1930 vela Mizorama Thlarau Thianghlim hnathawh lo thleng changtute chuan, taksa chetna, khurh hlawk hlawkna te leh \awnghriatlohva \awngna te an dawng ta zel a.