23/03/2026
TECHNOVETION FEST_2026
શ્રી વી.એમ. મહેતા મ્યુનિ. આર્ટ્સ એન્ડ કોમર્સ કોલેજમાં યુવા નવપ્રવર્તકોની સર્જનાત્મક ઝલક
શ્રી વી.એમ. મહેતા મ્યુનિ. આર્ટ્સ એન્ડ કોમર્સ કોલેજ, જામનગરના ઇનોવેશન ક્લબ દ્વારા તા. 28 ફેબ્રુઆરી 2026, શનિવારે સવારે 9:00 વાગ્યાથી “ટેક્નોવેશન ફેસ્ટ–2026”નું ઉત્સાહભેર અને સફળ આયોજન કરવામાં આવ્યું હતું. આ કાર્યક્રમનો મુખ્ય હેતુ વિદ્યાર્થીઓમાં સર્જનાત્મકતા, વૈજ્ઞાનિક દૃષ્ટિકોણ, ટેકનોલોજી પ્રત્યે રસ અને ટકાઉ નવીનતા (Sustainable Innovation) પ્રત્યે જાગૃતિ અને પ્રેરણા વિકસાવવાનો હતો.
આ ટેક્નોવેશન ફેસ્ટમાં કુલ 16 વિદ્યાર્થી જૂથો તથા 52 વિદ્યાર્થીઓએ ઉત્સાહપૂર્વક ભાગ લીધો હતો, જ્યારે લગભગ 12 વિદ્યાર્થીઓએ સ્વયંસેવક તરીકે સેવાઓ આપી કાર્યક્રમને સફળ બનાવવામાં સહકાર આપ્યો હતો. આ કાર્યક્રમ વિદ્યાર્થીઓ માટે તેમના વૈજ્ઞાનિક તથા ટેકનોલોજીકલ વિચારો અને પ્રોજેક્ટ્સ રજૂ કરવાની સશક્ત મંચ સાબિત થયો.
વિદ્યાર્થીઓએ વાસ્તવિક જીવનમાં ઊભી થતી વિવિધ સમસ્યાઓ માટે પ્રયોગાત્મક અને સર્જનાત્મક ઉકેલો રજૂ કરતાં અનેક નવીન મોડેલ્સ અને પ્રોટોટાઇપ્સ પ્રદર્શિત કર્યા. વિવિધ જૂથોએ ટેકનોલોજી, પર્યાવરણ સંરક્ષણ અને સામાજિક ઉપયોગિતાને ધ્યાનમાં રાખીને પોતાના પ્રોજેક્ટ્સ આત્મવિશ્વાસ અને ઉત્સાહ સાથે રજૂ કર્યા.
પ્રદર્શનમાં રજૂ થયેલા કેટલાક મુખ્ય અને આકર્ષક પ્રોજેક્ટ્સમાં સોલાર એનર્જીથી ચાલતો ઇન્વર્ટર બલ્બ, LiFi વાયરલેસ ઑડિયો ટ્રાન્સમિશન સિસ્ટમ, Arduino આધારિત વેટ અને ડ્રાય ડસ્ટબિન, ઇકો વોરિયર્સ પ્રોજેક્ટ, સ્માર્ટ ગ્લાસિસ, પાઈઝો-ઇલેક્ટ્રિક ફૂટવે, હાઇડ્રોલિક JCB મોડેલ, વાયરલેસ પાવર ટ્રાન્સફર સિસ્ટમ, GSRTC ઑનલાઇન બસ પાસ સિસ્ટમ, સોલાર એનર્જી એપ્લિકેશન્સ, માઇક્રોસ્કોપ ડેમોન્સ્ટ્રેશન અને ઓર્બૂટ ગ્લોબ ઇન્ટરેક્ટિવ લર્નિંગ મોડેલ જેવા પ્રોજેક્ટ્સ ખાસ આકર્ષણનું કેન્દ્ર રહ્યા હતા.
આ કાર્યક્રમનું આયોજન કોલેજના પ્રિન્સિપલ ડૉ. જી. બી. સિંહના માર્ગદર્શન હેઠળ કરવામાં આવ્યું હતું. તેમના સતત પ્રોત્સાહન અને પ્રેરણાથી વિદ્યાર્થીઓમાં ટેકનોલોજીકલ સર્જનાત્મકતા તથા નવીન વિચારશક્તિને પ્રોત્સાહન મળ્યું.
કાર્યક્રમનું સંકલન ઇનોવેશન ક્લબના કોર્ડિનેટર ડૉ. દર્શિતા દવે દ્વારા કરવામાં આવ્યું હતું. સાથે જ કોકોર્ડિનેટર ડૉ. નિતક્ષા ગેડિયાએ વિદ્યાર્થીઓને માર્ગદર્શન આપીને તથા સમગ્ર આયોજનને સુવ્યવસ્થિત રીતે પાર પાડવામાં મહત્વપૂર્ણ યોગદાન આપ્યું હતું.
ટેક્નોવેશન ફેસ્ટ–2026 માટે નિર્ણાયક તરીકે સરકારી પોલિટેકનિક કોલેજ, જામનગરના પ્રોફેસર્સ પ્રો. રાહુલ ઓઝા, પ્રો. ડૉ. વી. એસ. તેજવાણી અને પ્રો. સતિશકુમાર ગોરીએ મહત્વપૂર્ણ ફરજ બજાવી હતી. તેમણે વિદ્યાર્થીઓના સર્જનાત્મક પ્રયાસો અને આયોજકોની મહેનતને બિરદાવતાં જણાવ્યું કે આવા કાર્યક્રમો વિદ્યાર્થીઓમાં સંશોધન, નવીનતા અને પ્રયોગાત્મક અભિગમ વિકસાવવામાં મહત્વપૂર્ણ ભૂમિકા ભજવે છે.
આ સમગ્ર કાર્યક્રમને સફળ બનાવવા કોલેજના ટીચિંગ તથા નોન-ટીચિંગ સ્ટાફે પણ સહકાર અને જહેમતપૂર્વક યોગદાન આપ્યું હતું. સમગ્ર કાર્યક્રમ નું સફળ સંચાલન બી.કોમ સેમ 6 ની વિદ્યાર્થિની દર્શના ઝાલા એ કર્યું હતું.
વિદ્યાર્થીઓએ પોતાના પ્રોજેક્ટ્સ આત્મવિશ્વાસપૂર્વક રજૂ કરતાં મુલાકાતીઓ અને પ્રાધ્યાપકોને તેમના પ્રયોગોના વૈજ્ઞાનિક સિદ્ધાંતો, ટેકનોલોજીકલ ઉપયોગ અને સામાજિક મહત્વ વિશે વિગતવાર સમજાવ્યું.
આ રીતે ટેક્નોવેશન ફેસ્ટ–2026 વિદ્યાર્થીઓમાં વૈજ્ઞાનિક દૃષ્ટિકોણ, સર્જનાત્મકતા અને ઉદ્યોગસાહસિકતા વિકસાવવા માટે એક નોંધપાત્ર પહેલ સાબિત થયો. સાથે સાથે આ કાર્યક્રમ દ્વારા શૈક્ષણિક પરિસરમાં નવીનતા અને સંશોધન સંસ્કૃતિને પ્રોત્સાહન મળ્યું.
કાર્યક્રમના અંતે તમામ ભાગ લેનારા વિદ્યાર્થીઓ, સ્વયંસેવકો અને આયોજકોને અભિનંદન પાઠવી આ ઉત્સવનું સફળ સમાપન કરવામાં આવ્યું.