19/03/2026
એ.કે. દોશી મહિલા કોલેજમાં સમાજશાસ્ત્ર વિભાગ દ્વારા વિશ્વ મહિલા દિવસની ઉજવણી
વિશ્વભરમાં દર વર્ષે ૮ માર્ચના રોજ ઉજવાતા વિશ્વ મહિલા દિવસ નિમિત્તે એ.કે. દોશી મહિલા કોલેજમાં સમાજશાસ્ત્ર વિભાગ દ્વારા 12 માર્ચ ના રોજ વિશેષ કાર્યક્રમનું આયોજન કરવામાં આવ્યું. આ કાર્યક્રમ ના આયોજન નો હેતુ મહિલાઓમાં સશક્તિકરણ, તેમના અધિકારો અને સમાજમાં તેમના મહત્વ વિશે જાગૃતિ ફેલાવવાના હેતુથી કરવામાં આવ્યું હતું.કોલેજના પ્રિન્સિપાલશ્રી ડૉ. ચેતના મેડમ ભેંસદડિયા ના માર્ગદર્શન અને પ્રેરણાથી કાર્યક્રમ ખૂબ જ ઉત્સાહભેર અને સફળતાપૂર્વક યોજાયો હતો.
કાર્યક્રમની શરૂઆત, રાષ્ટ્રગીત, સ્વાગત, દીપ પ્રાગટ્ય,અને પ્રાર્થના, સાથે કરવામાં આવી હતી. ત્યારબાદ કોલેજના પ્રિન્સિપાલ શ્રી ડૉ. ચેતના મેડમ ભેંસદડીયા એ પોતાના સંબોધનમાં વિશ્વ મહિલા દિવસના મહત્વ વિશે પ્રકાશ પાડ્યો હતો. તેમણે જણાવ્યું હતું કે મહિલાઓ માત્ર પરિવારની જ નહીં પરંતુ સમગ્ર સમાજ અને રાષ્ટ્રના વિકાસમાં મહત્વપૂર્ણ ભૂમિકા ભજવે છે. મહિલાઓનું શિક્ષણ, આત્મવિશ્વાસ અને સ્વાભિમાન સમાજમાં સમાનતા અને પ્રગતિ માટે ખૂબ જ જરૂરી છે. તેમણે વિદ્યાર્થીનીઓને જીવનમાં આત્મનિર્ભર બનવા, પોતાના હકો અંગે જાગૃત રહેવા અને સમાજમાં સકારાત્મક પરિવર્તન લાવવા માટે પ્રેરિત કર્યા હતા.ત્યારબાદ સમાજશાસ્ત્ર વિભાગના પ્રોફેસર હેડ ડૉ. ભાવના ગામીતે વિશ્વ મહિલા દિવસના ઐતિહાસિક પરિપ્રેક્ષ્ય, તેની ઉત્પત્તિ અને આજના સમયમાં તેની પ્રાસંગિકતા વિશે વિસ્તૃત માહિતી આપી હતી.તેઓએ જણાવ્યું હતું કે જ્ઞાન અને સંસ્કાર દ્વારા મહિલાઓ સમાજમાં મહત્વપૂર્ણ પરિવર્તન લાવી શકે છે.તેમજ આ પ્રસંગે સમાજશાસ્ત્ર વિભાગના પ્રોફેસર ડૉ. ધર્મિષ્ઠા કરડાણીએ પણ પોતાના પ્રેરણાદાયક વિચારો રજૂ કર્યા હતા. તેમણે મહિલાઓના શિક્ષણ, સશક્તિકરણ અને આત્મવિશ્વાસ વિશે મહત્વપૂર્ણ વાતો કરી હતી. તેમણે મહિલાઓના હકો માટે થયેલા સંઘર્ષ અને સમાજમાં મહિલાઓના વધતા યોગદાન અંગે વિચારપ્રેરક ચર્ચા કરી હતી.
કાર્યક્રમ દરમિયાન વિદ્યાર્થીનીઓએ પણ ઉત્સાહપૂર્વક ભાગ લીધો હતો. વિદ્યાર્થીનીઓ દ્વારા મહિલા સશક્તિકરણ વિષયક કાવ્યપઠન, ડિબેટ, પ્રશ્નોત્તરી, પ્રેરણાત્મક ચાર્ટ, ડાન્સ, નાટક, સ્પીચ, દ્વારા વિવિધ કૃતિ રજૂ કરવામાં આવ્યા હતા, જેના કારણે સમગ્ર કાર્યક્રમ વધુ પ્રેરણાદાયક અને અર્થપૂર્ણ બની ગયો હતો.આ કાર્યક્રમને સફળ બનાવવા માટે કોલેજના તમામ સ્ટાફ પ્રોફેસરશ્રીઓ અને વિદ્યાર્થીનીઓએ સહકાર અને ઉત્સાહપૂર્વક ભાગ લીધો હતો. તેમના સહયોગ અને સક્રિય ભાગીદારીના કારણે વિશ્વ મહિલા દિવસની ઉજવણી ખૂબ જ સુંદર અને સ્મરણિય બની હતી. સમાજશાસ્ત્રના ટી.વાય.બીએ ના વિદ્યાર્થીનિ શ્રી અગ્રવાત હેતલ દ્વારા પ્રિન્સિપાલશ્રી, સ્ટાફ સભ્યો અને વિદ્યાર્થીનીઓનો આભાર વ્યક્ત કરી કાર્યક્રમને સફળ કર્યો હતો.અંતમાં સૌએ એકસાથે રાષ્ટ્રગાન ગાઈને કાર્યક્રમને દેશપ્રેમ અને ગૌરવની ભાવનાથી પૂર્ણ કર્યો હતો.
