16/06/2022
বাহনা মহাবিদ্যালয়ৰ ৰসায়ন বিজ্ঞান বিভাগৰ ৰসায়ন সমাজে বাহনাৰ অগ্ৰনী স্বেচ্ছাসেৱী অনুষ্ঠান 'সেৱাৰ' সহযোগত বাহনা তিনিআলিত ৫ জুন তাৰিখে বিশ্ব পৰিবেশ দিৱসৰ লগত সংগতি ৰাখি এখনি বাটৰ নাট প্ৰদৰ্শন কৰে। আৰম্ভণিতে এই বাটৰ নাট খনি প্ৰদৰ্শন কৰিবলৈ আগবাঢ়ি অহা বাবে ৰসায়ন বিজ্ঞান বিভাগৰ ছাত্ৰ ছাত্ৰীসকলক সেৱাৰ সম্পাদক শ্ৰী ৰাজীৱ কুমাৰ নাজিৰে আদৰণি জনায়। বাহনা মহাবিদ্যালয়ৰ ৰসায়ন বিজ্ঞান বিভাগৰ মুৰব্বী অধ্যাপিকা ড' পৰিণীতা বৰাই নাটকখন ৰচনা কৰি দিয়া শ্ৰী জগন্নাথ অগ্নি বৰা আৰু পখিল বৰাৰ শলাগ লয় আৰু উপস্থিত থকা ড' গিৰিন্দ্ৰ নাথ কাকতিয়ে বিশ্ব পৰিবেশ দিৱসৰ তাৎপৰ্য ব্যাখ্যা কৰি কয় যে ১৯৭৪ চনৰ বিশ্ব পৰিবেশ দিৱসৰ মূল বিষয়বস্তু আৰু ২০২২ চনৰ মূল বিষয়বস্তু একেই- এখন মাত্ৰ পৃথিৱী (আমি জীয়াই থাকিবলৈ হ'লে পৃথিৱীখন বচাই ৰাখিব লাগিব) অৰ্থাৎ এতিয়াও বিশ্বৰ জনসাধাৰণ পৰিবেশৰ প্ৰতি সচেতন হোৱা নাই। গোলকীয় উষ্ণতা বৃদ্ধিৰ ফলত অভাৱনীয় ধৰণে জলবায়ুৰ পৰিবৰ্তন ঘটিছে। উপস্থিত থকা সৰ্বেশ্বৰ বৰাই দুআষাৰি বক্তব্য ৰাখে। নাটকখনত অভিনয় কৰে বিভাগৰ ছাত্ৰ ছাত্ৰী ক্ৰমে কৰবী শইকীয়া, কৌশিকী অগ্নি বৰা, দেৱযানী শইকীয়া, ধ্ৰুৱজ্যোতি শইকীয়া, প্ৰদীপ বৰা, লক্ষ্যজিৎ শইকীয়া আৰু জনাৰ্দন হাজৰিকাই, সহযোগ কৰে বিভাগৰ সকলো ছাত্ৰ ছাত্ৰীয়ে। আৰম্ভণিতে বাহনা মহাবিদ্যালয়ৰ পৰা বাহনা তিনিআলিলৈকে বিভিন্ন শ্ল'গানেৰে সমদল বাহিৰ কৰি এই নাট প্ৰদৰ্শন কৰে। নাটক প্ৰদৰ্শনৰ পিছত বিভাগৰ তৰফৰ পৰা উপস্থিত সকলোকে একোটাকৈ কপাহী কাপোৰৰ মোনা আৰু লগতে প্ৰাক্তন ছাত্ৰ দেৱজিৎ নেওগে যোগান ধৰা সাছী গছৰ পুলি যোগান ধৰা হয়। বিভাগৰ মুৰব্বী অধ্যাপিকা ড' পৰিণীতা বৰাৰ নেতৃত্বত ৰসায়ন বিজ্ঞান বিভাগৰ ফালৰ পৰা লোৱা এই পদক্ষেপক সকলোৱে শলাগ লয় আৰু ভবিষ্যতে যাতে এনেকুৱা অনুষ্ঠান বেছি সংখ্যক মানুহৰ মাজলৈ লৈ যাব পাৰি তাৰ বাবে ৰাইজৰ ফালৰ পৰা অনুৰোধ জনায়। শ্ৰী ৰাজীৱ কুমাৰ নাজিৰে অনুষ্ঠানটোৰ আঁত ধৰি অতি সুন্দৰভাৱে ৰাইজৰ মাজত বাটৰ নাটকখন উপস্থাপন কৰাত সহায় কৰে।
