02/03/2026
महात्मा गांधी विद्यामंदिर संचलित महिलारत्न पुष्पाताई हिरे कला, विज्ञान व वाणिज्य महिला महाविद्यालयात सावित्रीबाई फुले पुणे विद्यापीठाच्या राष्ट्रीय सेवा योजना विभागासह संयुक्त विद्यमाने दि. ५ फेब्रुवारी २०२६ रोजी ‘ऐतिहासिक स्थळ दत्तक योजना’ अंतर्गत एकदिवसीय जिल्हास्तरीय कार्यशाळा प्राचार्य डॉ. रजनी पाटील यांच्या अध्यक्षतेखाली महाराजा सयाजीराव गायकवाड राजवाडा, कौळाणे येथे संपन्न झाली.
कार्यशाळेच्या पहिल्या सत्रात मसगा महाविद्यालय, मालेगाव येथील इतिहास विभागप्रमुख प्रा. जितेंद्र पगार यांनी ‘ऐतिहासिक स्थळ संवर्धन जाणीव व जागृती’ या विषयावर मार्गदर्शन केले. “इतिहास पुराव्यांवर जगतो. गड-किल्ले व ऐतिहासिक स्थळे भावी पिढ्यांना सांस्कृतिक, अध्यात्मिक, भौगोलिक व राजकीय शिकवण देतात. या ठेव्याचे जतन प्रत्येकाचे कर्तव्य आहे,” असे आवाहन त्यांनी केले.
दुसऱ्या सत्रात प्रा. महादेव क्षीरसागर यांनी ‘महाराजा सयाजीराव गायकवाड कौळाणे राजवाडा : ऐतिहासिक वास्तू’ या विषयावर बडोदा संस्थानाच्या राजकीय, शैक्षणिक व सांस्कृतिक योगदानाबाबत सविस्तर माहिती दिली. कौळाणे राजवाडा हे स्थापत्यशास्त्राचे उत्कृष्ट उदाहरण असून, युनेस्को जागतिक वारसा स्थानोंमध्ये भारत सहाव्या क्रमांकावर आहे. पर्यटन, अर्थव्यवस्था व रोजगाराच्या दृष्टिकोनातून संवर्धन महत्त्वाचे असल्याचे त्यांनी सांगितले.
याप्रसंगी रा.से.यो. स्वयंसेवकांनी राजवाडा परिसरात वृक्षारोपण, स्वच्छता व सुशोभीकरण केले. या उपक्रमास राजवाडा व्यवस्थासमितीचे श्री. चक्रपाणी संतोष पुरी गोसावी यांचे सहकार्य लाभले. सूत्रसंचालन डॉ. तेजस्विनी सोनटक्के, प्रास्ताविक डॉ. शिल्पा यन्नावार, आभार प्रा. दिव्या पाटील यांनी मानले. प्रा.अनुज बोंगाणे यांचे विशेष सहकार्य लाभले.
#ऐतिहासिक_स्थळ_दत्तक_योजना
