17/08/2026
الوضع البشري كيدرس لينا الإنسان من جوانب ثلاث جانب ذاتي داخلي جانب تفاعلي خارجي واخر تاريخي مني كنقول ذاتي بمعنى هوية الشخص هنا كيدرس لينا الهوية ديال الشخص يعني حقيقة الشخص واش ثابتة أو متغيرة وشنو الأساس ديالها ثم قيمة الشخص بمعنى منين كتجي الإنسان قيمة وهاذ القيمة واش مطلقة أو نسبية واش نفسها نفس قيمة باقي الكائنات الأخرى او مختلفة واخيرا الشخص بين الضرورة والحرية هنا كنبيغو نعرفو واش الشخص حر في أفعاله وتصرفاته يفعل ما يريد وقتما شاء ولا هو شخص خاضع لمجموعة من الضرورات الخارجية والداخلية
ثم المفهوم الثاني مفهوم الغير هنا الانسان مابقاش قادر يلبي الحاجيات ديالو وحدو ولا في حاجة إلى الغير هاذ الغير هو انا اخر مشابه ومخالف لي في نفس الوقت اول محور هو. وجود الغير هنا بغينا نعرفو. اش حنا كأشخاص في حاجة ماسة إلى الغير باش نعرفو راسنا ونفهموه ونتعلموا اي حاجة ولا نقدرو نستغنيو على الغير ونديرو هذشي وحدنا حقاش الغير كيشكل تهديد وضغط عليا ثم معرفة الغير بمعنى كيفاش غادي نعرف هاذ الغير واش عن طريق التواصل نهضر معاه نقرب ليه...أو عن طريق البينداتية اي نحط راسي في بلاصتو ونعيش التجربة ديالو باش نعرفو ولا هاذ المعرفة اصلا مستحيلة منقدرش نعرف الغير ثم العلاقة مع الغير شنو العلاقة لي يمكن تجمع بيني وبين الغير واش علاقة صداقة أو علاقة صراع أو علاقة غيرية
واخيرا مفهوم التاريخ(يهم آداب وعلوم إنسانية فقط ) هنا بغينا ندرسو التاريخ الإنساني وبغينا نعرفو اول محور واش المعرفة التاريخية ممكنة يعني واش نقدرو نعرفوا التاريخ معرفة علمية دقيقة ولا هاذ التاريخ هو اصلا عبارة عن سرد ورواية ثم التاريخ وفكرة التقدم كيفاش كيتقدم التاريخ واش عبارة عن خط مستقيم يعني متسلسل سبب كيعطينا نتيجة ولا كتحكم فيه الصدفة والعرضية والفجائية بحال الحرب العالمية الأولى والثانية ثم دور الإنسان في التاريخ واش الإنسان عندو شي دخل شي دور في التاريخ يعني قادر يغير شي حاجة في التاريخ ولا هو مجرد أداة ووسيلة كيتحكم فيها التاريخ باش يوصل المبتغى ديالو ومن بعد كيتخلص منو
هاذي هي خلاصة مجزوءة الوضع البشري وهذشي لي غادي نخدمو عليه فيها ان شاء الله
