25/08/2022
KOKOMAN O KAPAKA-ZADKAA KO MIYAWAFAT
So kapakazadkaa ko miyawafat na pd aya ko manga Pipiya galbk a mala a balas a khaparoli ron o taw, labaw ron igira para ko Lokes iyan a miyawafat.
Pzadka so Taw sa aya niyat iyanon na so miyawafat, ma'na aya niyat iyan na mizampay so Balas angkuto a sakda sii ko miyawafat.
" أفلها أجر إن تصدقت عنها؟ قال النبي: نعم. "
Sakataw a Mama a miyakatalingoma ko Nabi saw: Ya Rasulullah! Ino Kisampay so Balas ki Ena akn a miyawafat o pakazadkaan akn ?, Tig o Nabi (saw) : OWAY (Pkisampay ron).
👉 SO KAZADKA NA MADAKL I KLASE:
Khapakay a Gulalan sa Perak a ipmbgay ko Miskiin, odina sii ko manga Wata ilo, odina siiko manga Madrasah ago Toril, odina so kabangon sa Masjid. Ago so salakaw san.
Odina pangne'ngkn a iphamgay nga ko manga Siringan ka, a aya niyat kawn na para ko miyawafat.
👉 SO MAKAPANTAG KO KATIMO TIMO A DII KAPAGANAA KO MANGA TAW:
Da marata o timo ka sa Taw a phaganaan ka siran a ipzadka ngka siiko miyawafat ASARKA DINGKA TNDOWA SO GAWII, DATAR OPAMA ANGKAE A KANGGATOSAN.
Di khapakay angkae a Adat o Sabaad a GATOSAN, ma'na mawma so ikamagatos a gawii phoon ko kiyawafat o taw na timuon so madakl a taw ka paganaan siran. Odina Oman Pat Polo gawii.
DA PAKA-ASAL ANAN KO AGAMA. MA'NA BID'AH.
Aya datar iyan na so Kandalimakan (Apiya didn aya miya-osay ka miyambasisa bo aya o manga Ulama tano.)
👉 Pakapzadkaan kabo so miyawafat na sigurado angka a MISUNGKAD KA KO OKIT O NABI (saw) ka an matarima.
Tumo a bgan ka a direso sii ko makakikinanglan so ipzadka ngka a perak, odina sii ko manga wata ilo a totoreln. Odina sii sa Madrasah ago siiko kamapiyaan o mga Masjid.
Ka pd anan sa manga Galbk a Di katpd so Balas ago so diron di kanggonae.
👉 SO MAKAPANTAG KO KHIPAG-UMRAAN ODINA KIPNAYKN KO MIYATAY:
Oda makapnayk so miyawafat na khapakay a ipnayk ska niyan (pkapalyogat pn aya sii ko pd a btad datar opama o adn a inibagak o taw a tamok iyan na dadn makapag-hajj taman sa kiyawafat iyan).
Aya sarat iyan na kinanglan a mininayk o taw a ginawa niyan, go bo so miyawafat. Datar mambo anan o Umrah.
📚 Aya isa Bulawan a Katharo i Shaykh Othaimen (rahimahullah) a pd ko ma'na niyan:
So a tig iyan so Lalayon ka Di kinduwaan ko Mbala a Lokes ka na aya pinakapirmiro ago mala a balas a amal a mapenggalbk o Wata para ko lokes iyan.
Gyanan so Katharo o Nabi (sallallahu alayhi Wasallam) a Wata a Sálih a lalayon iyan gii nduwaa so lokes iyan, na pkisampay ron so balas ago so nganin a duwaa niyan para ko lokes iyan.
PANGNNTA KIYASABOTAN.
PAGOMAWMANAN O ALLAH SO SABOT TANO KO AGAMA ISLAM. ÁMEEN YA RABB
✍ (Abu Haneen) Nasruddin Ibn Abdullah
Qassim University, KSA
