UP Office of the Student Regent

19/10/2026

ALERT | Marahas na binubuwag ng mga kapulisan ang mga nagkakampuhan sa harap ng Department of Agrarian Reform (DAR). Sugatan ang mga kasamang kabataan at magsasaka mula sa pananakit ng mga pulis.

Inuudyok ang mgq Iskolar ng Bayan na sumunod sa kampuhan ngayon upang patibayin ang hanay.

12/10/2026

| Kumilos ang mga Iskolar ng Bayan at kabataan mula sa iba’t ibang State Universities and Colleges (SUCs), organisasyon at sektor upang ipatambol ang panawagan na itaas ang pondo sa edukasyon at hindi ilaan sa pasismo at korapsyon.

Ginanap ngayong araw ang huling botohan para sa magiging pondo sa taong 2027 sa House of Representatives kung saan kitang-kitang muling binarat ng administrasyon ni Marcos Jr. ang kaban ng bayan.

Hindi titigil ang mga Iskolar ng Bayan na igiit ang panawagan para sa tunay na pondo na tutugon sa pangangailangan ng sangkaestudyantehan at masa! Pondo na walang bahid ng korapsyon at hindi magiging daluyan ng pasismo.

ISKOLAR NG BAYAN, TULOY-TULOY ANG LABAN!
PONDO SA EDUKASYON, HINDI SA KORAPSYON!

11/10/2026

! | ISKOLAR NG BAYAN, KILOS NA LABAN SA KALTAS-PONDO SA EDUKASYON! ✊🏻🧡

Bukas, nakaamba ang ₱2.95B kaltas na siyang pinakamalaking bigwas sa pondo ng kasaysayan ng UP. Gaganapin na ang ikatlo at panghuling pagbasa ng pinapanukala na ₱7.2-trillion 2027 pondo para sa bansa. Sa kabila ng pondo na ito ay nananatili ang pagkaltas at kakulangan sa pondong inilalaan para sa edukasyon.

Mula sa ₱29.5B na inilaan sa UP para sa 2026, lumiit na ito sa nakatakdang ₱26.5B sa 2027. Ang pagkakaltas na ito ay nagpapakita kung paano patuloy na ginigipit ng gobyerno ang sektor ng edukasyon, at sa halip, ay pinipiling buhusan ng pondo ang korapsyon at pasismo para sa kanilang pansariling interes.

Ang pondo ng bayan ay para sa serbisyong panlipunan, kasama ang sapat at nararapat na pondo pang-edukasyon! Iskolar ng Bayan, kilos na kontra budget cuts!

📅 October 12 (Monday): National Day of Action to Stop the Corrupt Budget | UP Systemwide Mobilizations! 🗣️

Sama-sama nating ipaglaban at paingayin ang panawagan para sa sapat na badyet para sa mga pangunahing serbisyong panlipunan!

TUTULAN ANG KALTAS SA PONDO NG UP! IPAGLABAN ANG MAS MATAAS AT SAPAT PONDO SA EDUKASYON AT SERBISYONG PANLIPUNAN! PONDO SA EDUKASYON, HINDI SA KORAPSYON!

10/10/2026

NO TO BUDGET CUTS! PONDO SA EDUKASYON, HINDI SA KORAPSYON! ✊🏻🧡

Sa darating na Lunes, gaganapin na ang huling araw at botohan ng Budget Lobbying sa House of Representatives para sa magiging pondo ng iba’t ibang sektor sa taong 2028. Sa kabila ng patuloy na panawagan ng mamamayan para sa sapat na badyet para sa mga pangunahing serbisyong panlipunan, nananatili ang pangamba sa kakulangan ng pondong inilalaan para sa edukasyon. At makikita pa rin ang patuloy na pagkaltas ng gobyerno sa pondo ng edukasyon at napupunta lamang ito sa korapsyon at pasismo. 😤

Sa ganitong kalagayan, mahalagang suriin kung saan napupunta ang pondo ng bayan, kung paano ito inilalaan, at kung tunay bang napakikinabangan ito ng mamamayan. Ang bawat pondong nagmumula sa buwis ng mamamayan ay nararapat na gamitin para sa kapakanan ng publiko, lalo na sa pagpapaunlad ng edukasyon at iba pang batayang serbisyo. 🗣️

Kung kaya naman, inaanyayahan ang mga Iskolar ng Bayan na mas siyasatin pa nang maigi ang pagkilatis sa pondo ng UP para sa 2027 sa inihahandog ng UP the Budget Network na UP Budget Critique Educational Discussion!

🗓️ October 12 (Monday) ng 6-8 PM

📍 Room 405, Student Union Building, UP Diliman at via Zoom

🆙 MAG-REHISTRO: https://tinyurl.com/UPBudgetCritiqueReg

Sama-sama nating igiit ang pondo na tunay na tumutugon sa pangangailangan ng mamamayan. Iskolar ng Bayan, labanan ang kaltas sa pondo sa edukasyon! Ipaglaban ang sapat na pondo para sa edukasyon, serbisyong panlipunan, at makatarungang kinabukasan para sa kabataan!

07/10/2026

05/10/2026

PONDO SA EDUKASYON, HINDI SA KORAPSYON! NO TO BUDGET CUTS!

Nitong ika-23 ng Setyembre, nakiisa ang UP Office of Student Regent kasama ang KABATAAN PARTYLIST, National Union of Students of the Philippines (NUSP), KASAMA sa UP, Youth Rage Against Corruption (YRAC), UP Diliman University Student Council, UP Manila University Student Council, at iba pang mga pamantasan sa pagpapadala ng Iskolar ng Bayan 2027 Budget Position Paper, na ginanap sa House of Representatives.

Sa nangyaring budget deliberations, binigyang din ng dating UP Student Regent at kasalukuyang Kabataan Partylist Representative Cong. Renee Co ang epekto ng malaking kaltas sa pondo para sa edukasyon. Bakas pa rin ang mga hindi pa natatapos na infrastructure at kakulangan sa pagtugon sa basic student services. Gayundin, ibinigyang-diin ang pagtutol sa mga komersyalisadong proyekto sa loob ng Unibersidad, tulad ng UP SDG Wellness Park.

Patuloy na bitbit ng mga Iskolar ng Bayan ang panawagan para labanan ang kaltas sa pondo sa UP, pataasin ang pondo para sa edukasyon, at tigilan na ang pagnanakaw para sa kinabukasan ng mga kabataan! Sa bawat pagtalakay sa pondo, dapat manatiling sentro ang karapatan ng bawat kabataan sa libre, de-kalidad, at aksesibleng edukasyon. ✊🏻❤️‍🔥

05/10/2026

MAPAGPALAYANG ARAW NG MGA G**O! 👩🏻‍🏫❤️‍🔥

Mula UP Baguio hanggang UP Mindanao, maalab na binabati ng mga Iskolar ng Bayan ang ating mga kaguruan para sa World Teacher's Day ngayong ika-5 ng Oktubre. Sa laban ng mga mag-aaral ng UP, saksi ang Opisina sa kung paano ang dedikasyon at determinasyon ng ating mga g**o na patuloy na gumagabay at nakikibaka kasama ang mga kampanya ng ating komunidad. Sa katunayan, hindi tayo nagkakahiwalay sa ating mga danas, lalo na sa epekto ng nakaambang P2.95B na kaltas sa pondo ng UP.

Sa kabila ng mga pagbati, patuloy ang hindi makatarungang paghihirap nila, sa loob o labas man ng pamantasan. Mula ito sa mababang sweldo at limpak-limpak na gawain dahil sa neoliberal na porma ng edukasyon. Nitong isang araw lamang sa isang iglap protesta na ikinasa sa Malacañang, tahasang pinasista ang ating mga kaguruan kahit dala lamang nila ang kanilang mga panawagan. Sugatan mula sa agresyon ng mga pulis ang mga g**ong may lehitimong mga hinaing. Ngunit, hindi nagpatinag ang ating mga g**o sapagkat kanina, matagumpay na nailunsad ang kanilang pagkilos sa Mendiola. Ito ang tunay na bakas ng mga g**ong makabayan, na kahit sa harap pa ng panggigipit at pasismo, mas nananaig ang prinsipyadong pagtindig para sa kanilang mga batayang karapatan.

Sa pagwawakas ng araw, hindi dapat nakukulong sa mga mensahe at regalo ang pagpapakita ng pagpapahalaga sa ating mga pakuldad. Sa halip, patuloy tayong makiisa sa kanilang laban na gawing 50k ang entry-level ng kanilang sweldo, maitaas sa 40k ang Professional Grant sa piling mga akademikong larangan, ibaba ang presyo ng pangunahing mga bilihin, at labanan ang kaltas sa pondo sa edukasyon!

PONDO SA EDUKASYON, HINDI SA KORAPSYON! TULOY-TULOY ANG LABAN NG MGA G**O NG BAYAN! ✊🏻📖

21/09/2026

TELEVISED. An online film watching and educational discussion.

Iniimbitahan ang ating mga Iskolar ng Bayan na makinood at makipagtalakayan sa isang pelikulang tatalakay sa mga pangyayari noong Batas Militar noong panahon ni Marcos Sr.

Bukod sa pagbaha natin sa lansangan, pagbibigay pagkakataon ito para sa mga nais pa rin makiisa sa mga pagkilos ngayong araw. Bukas ito sa lahat ng konseho, publikasyon, organisasyon, at indibidwal na mga Iskolar ng Bayan.

📣 Mag-rehistro: https://tinyurl.com/OSRML54Televised

Never forget the corruption! Never again to impunity! ✊🏻❤️‍🔥