04/10/2026
𝗣𝗔𝗚𝗣𝗨𝗣𝗨𝗚𝗔𝗬 𝗦𝗔 𝗠𝗚𝗔 𝗞𝗔𝗚𝗨𝗥𝗨𝗔𝗡 𝗡𝗚 𝗦𝗔𝗠𝗙𝗜𝗟
“𝘐𝘱𝘪𝘯𝘢𝘨𝘱𝘢𝘱𝘢𝘴𝘢𝘭𝘢𝘮𝘢𝘵 𝘬𝘰𝘯𝘨 𝘯𝘢𝘨𝘪𝘯𝘨 𝘨𝘶𝘳𝘰 𝘬𝘪𝘵𝘢.”
Ito marahil ang isa sa mga katagang nais ipaabot ng bawat mag-aaral sa mga gurong naging bahagi ng kanilang paglalakbay.
Sino ang huhubog sa aming kaalaman kung wala kayo? Paano kami matututong matapang na tumindig sa harap ng iba kung hindi ninyo kami hinikayat na maniwala sa aming sarili? Paano namin makikilala ang aming sariling kakayahan kung hindi dahil sa mga salitang minsang naging lakas namin sa panahon ng pag-aalinlangan?
Sa bawat aral na inyong ibinabahagi, bawat paalalang inyong iniiwan, at bawat pagkakataong pinipili ninyong maniwala sa amin, higit pa sa kaalaman ang inyong naipamamanang kumpiyansa, tapang, at paniniwalang kaya naming tahakin ang sarili naming landas.
Sa araw na ito, muli naming ipinapaabot ang aming pasasalamat at pagkilala. Nakikita namin kayo. Pinahahalagahan namin kayo. At hindi namin malilimutan ang mga gurong naging bahagi ng aming paghubog.
Maraming salamat sa pagiging ilaw sa aming pagkatuto at kasama sa paghubog ng aming kinabukasan.
𝗠𝗮𝗹𝗶𝗴𝗮𝘆𝗮𝗻𝗴 𝗔𝗿𝗮𝘄 𝗻𝗴 𝗺𝗴𝗮 𝗚𝘂𝗿𝗼, 𝗺𝗴𝗮 𝗺𝗶𝗻𝗮𝗺𝗮𝗵𝗮𝗹 𝗻𝗮𝗺𝗶𝗻𝗴 𝗞𝗮𝗴𝘂𝗿𝘂𝗮𝗻 𝗻𝗴 𝗦𝗔𝗠𝗙𝗜𝗟!
