19/09/2020
۔۔۔۔۔ مسلسل قطعہ ۔۔۔۔۔
,,شہنشاہ آدب,,
,,مہرغلام محمد”درؔد؎“
اللہ سائیں دی تے تیری محبت دی سونہہ
تیتھوں دنیا دی کائی شئے پیاری وی نئیں ,,
دل دے وچ تیرا گھر ذکر تیرا سدا
یاد تیری میں لحظہ وِساری وی نئیں ,,
میں تاں تیرا حقیقی طلبگار ہاں
منہ زبانی تیرے نال یاری وی نئیں ,,
تیری خاطر میں ونگاں تے ہوکے دتن
لاہی سر توں عقیدت دی کھاری وی نئیں ,,
بھانویں جیڈے وی راہ وچ طوفان آندے رِہ
بزدلاں وانگ ہمت تاں ہاری وی نئیں ,,
جنہوں زردار ذر نال مُل لئے لووے
سوہنڑیاں میری چاہت بازاری وی نئیں ,,
توڑے دل شکنیاں روز توئیں کیتیاں
میں تاں کدھ نفرتاں دی اُساری وی نئیں ,,
تیرے راہواں توں کنڈے ہٹیندا رہیاں
دتی پلکاں توں وکھرا بوہاری وی نئیں ,,
ہکو ہک میرا جگ تے سہارا ہیں توں
”درؔد؎“ نوں زندگی نالوں پیارا ہیں توں ,,
تینوں میں ورگے بھانویں ہزاراں ہوسن
مینوں توئیں ورگی ایہہ دنیا ساری وی نئیں ,,
(اجنبی)
