30/07/2024
بلوچ یکجہتی کمیٹی ءِ راجی مُچی ءِ بندات کنگ بوتگ ریاست ءَ بلوچ مھلونک ءِ گار ءُ بیگواھی کنگ گیش کرتگ چوشیں روچے نہ انت ھشت ءُ دہ ورنا گار ءُ بیگواہ نہ بیت ۔ ریاست ءَ کریک ڈاؤن بندات کرتگ آئی کم زانتی انت کہ مھلونک نون پہ لٹ ءُ ٹوپ دارگ نہ بیت ھمنچو گیش ریاست جبر کنت مھلونک ھمنچو پاد کیت ۔ مرچی راجی مُچی ءَ بلوچستان ءِ تہ ءَ راجی جُنز ءِ تہ ءَ گیشی آرتگ مھلونک ءِ دل ءَ تُرس ھلاس کُرتگ
بلوچ اسٹوڈنٹس فرنٹ ءِ بُنجاہ ءِ نیمگ ءَ یک ھیلکاری دیوانے بُنجاھی کماش جاوید بلوچ ءِ سروکی ءَ برجم دارگ بوتگ ۔اے دیوان ءِ سرھال "دنیا ءِ مَٹ بوتگیں جاورال ءُ هستیں وهد ءِ اُلسی گَھگیری " ات- سنگتاں تران کنان ءَ گْوشت کہ بیست ءُ یکُمی کرن ءِ بندات زوراکانی زوال ءِ کرن پدّر بوتگ ایشی ءَ چہ دنیا ءِ تہ ءَ مُلکاری ءُ راجمانی گپچل ودی بوتگ-امریکہ ءِ دو هزار هپت ءُ هشت ءِ مالی بُھران ءَ یورپ ءَ بگر داں افریکہ ءُ مڈل ایسٹ ءَ تاں سرجمیں مُلکاں ءَ گپچل ءِ دور داتگ-آکوپائی وال اسٹریٹ زرمبشت ءَ بگر داں دو هزار یازده ءِ عرب مُلکانی آشوب ءُزرمبشت مرچی هم چِست ءُ ایری ءَ گوں هستانک دار انت-لاطینی امریکہ ءُ یورپ هم یکشل ءَ آشوب ءُ ردِ آشوب ءِ سُر ءُ پُرے تہ ءَ انت- زرباری ایشیا ءِ سرا بُھران ءِ سان کپتگ انت- گزرانکی گپچل ءَآماچ ءُ پدمنتگیں مُلک پیسر ءَ چہ نگیگیں جاورانی تہ ءَ بوتگ انت-میان استمانی گپچل ءَ گیشتر اڑاندہ ءُ جیڑه گیش کرتگ انت
سنگتاں تْران کنان ءَ گْوشت کہ مرچیگیں دنیا کہ آئی ربیت لُٹ ءُ پُل ءُ مکابلہ بازی ءِ سرا ایر اِنت ءُ اے راستی هَمُک گوستگیں روچ ءَ پدر بوگ ءَ انت- مرچی دنیا ءِ چست ءُ ایر ءُ جنگانی تہ ءَ ترندی همے سلسل ءَ پیدا بوتگ- یک نیمگ ءِ یوکرین ءِ تہ ءَ امریکہ ءُ نیٹو یوکرین ءِ لس مہلوک ءَ چہ گیش روس ءِ گوم ءَ جنگ کنگ ءَ انت،دومی نیمگ ءَ یوکرین ءِ لس مھلوک ءِ زندمان ءَ را وتی لوٹانی هاتر ءَ زند ءُ مرگ ءِ تہ ءَ دور داتگ-امریکہ ءُ نیٹو دنیا ءِ تہ ءَ وتی واکداری ءِ برجاه دارگ ءِ هاتر ءَ روس ءَ را جَنگ ءِ تہ ءَ برتگ تاکہ نیٹو ءَ امریکہ ءُ برطانیہ ءِ رهشون مھکم بکن انت نہ تھنا امریکہ ءِ پوجی ءُ تاکت ءَ گیش بکن انت روس ءِ پیمیں چِست بوتگیں ملک ءِ دیم ءِ دارگ ءُ نیزور کنگ ءُ آئی ءِ دارگ ءِ جھد ءَ کنگ ءَ انت-دومی نیمگ ءَ امریکہءِ نیمگ ءَ چہ همے پالیسی چین پیمیں گزرانکی ءُ سیاسی تاکتے ءِ هلاپ ءَ کارمرز بوگ ءَ انت همودا کہ امریکہ یوکرین ءُ جورجیا ءِ تہ ءَ روس ءَ را یک نہ اوشتوکیں جنگے سرا دور داتگ- همے امریکہ چین ءِ هلاپ ءَ تائیوان ءِ تہ ءَ یکیں سرشون ءَ کارمرز کنگ ءَ انت-دومی نیمگ ءَ امریکہ اے دمگ ءِ جنگانی سوب ءَ نگیگیں جاورانی تہ ءَ انت یوکرین ءِ جنگ ءَ چہ پیدا بوتگیں انرجی ءِ بحران ءَ یورپی یونین ءِ مُلکاناں مجبور کرتگ کہ آ دمگ ءِ تہ ءَ وتی تاکت ءَ برجاه دارگ ءِ واست ءَ امریکہ ءِ ” 3 نیٹو فارمولہ” ءِ بھر جوڑ بہ بنت۔دومی نیمگ ءَ انڈو پیسیفک ریجن ءَ چین ءِ هلاپ ءَ اسٹریلیا، برطانیہ ءُ امریکہ ءِ سروکی AUKUS اڑ دیگ بوتگ ” پیسیفک نیٹو” ءِ رنگ ءَ چین ءِ دیم ءِ دارگ ءِ جھد ءَ کنت۔همے رنگ ءَ امریکہ گون وتی عرب اتحادی مُلکاں گوں اسرائیل ءِ همراهی ءَ مشرق وسطیٰ ءَ ایران ءِ اسر ءُ رسوک ءَ هلاس کنگ ئے ءُ وتی اجارہ داری ءِ برجاه دارگ ءِ واست ءَ مزنیں خرچ ءُ تچ ءُ تاگ کنگ ءَ انت۔ غزہ ءُ لبنان ءَ اسرائیل ءُ دومی نیمگ ءَ حزب اللہ ءُ حماس ءِ سروکی ءَ هلاس نہ بووکیں جنگ ءِ بندات بہ بیت یاںکہ امریکہ ءُ یمن ءِ ملیشیا ءِ میان ءَ بحیرہ احمر ءَ یکشلیں پوجی چست ءُ ایر بہ بنت ءُ امریکہ ءِ نیمگ ءَ چہ شام ءُ عراق ءَ 80 کساس ءَ ٹارگٹ ءِ سرا فضائی بمباری بہ بنت اے درستیں همے درچ ءَ گون بندوک انت امریکہ ءِ نیٹو ءِ پیمیں پوجی الائنسز جوڑ کنگ دنیا ءِ ایردستیں راجاں ءَ یک نوکیں جھانی جنگے ءَ نیمگ ءَ برگ ءِ سان گندگ آیگ ءَ انت-
سنگتاں دیمتر ءَ تْران کنگ ءَ گْوشت یک نیمگے زوراکیں تاکت ایردستیں راجانی سرا کبزه گیری ءِ واست ءَ گوں وتی پوجی تاکت ءَ ایردستیں راجانی گلزمین ءِ سرا یکّے دومی ءِ هلاپ ءَ پوجی الائنس جوڑ کنگ ءَ انت-دنیا بازیں گپچل ءِتہ ءَ شُتگ، گران نیادی، بے روزگاری ءُ زندگی ءِ بنکی آسراتی ءَ چہ یک اربے ءَ کساس دنیا ءِ آبادی مرچی گیریبی ءِ زند گوازینگ ءَ انت-میان استمانی تاکت اے سنجیدگیں جیڑهانی توجیل کنگ ابید جنگ ءِ اڑاندہ ءَ گیشتر ترند کنگ ءِ سرشونی ءِ سرا جھد کنگ ءَ انت ایردستیں راجانی زندمان ءَ را جھنم جوڑ کرتگ- ما گندگ ءَ ایں اے گپچلانی تہ ءَ ایردستیں راج وتی گھگیری ءَ کنگ ءَ انت-وتی سرا زلم ءُ زوراکی ءَ نہ منّگ ءَ انت-فلسطین ءَ چہ بگر لبنان ءَ ، ءُ لبنان ءَ چہ بگر کردستان ءُ بلوچستان ءَ یکشل "عوامی تحریک" ءِ وسیلگ ءَ اے جنگانی هلاپ ءَ لس مردم وتی غصہ ءِ درانگاز کنگ ءَ انت۔زوراکانی دیم ءَ وتی سرا برجاهیں زوراکی ءِ بگیری ءَ جھد کنگ ءَ انت-
سنگتاں دمگی جاور هالانی سرا تران کنان ءَ گْوشت پاکستان اے وهد ءَ گزرانکی ءُ سیاسی بھران ءَ شُتگ- ما گندگ ءَ ایں آمدگس ، پوج ،پارلیمنٹ ءُ انتزامیہ درست بھرانی جاور ءِ تہ شُتگ انت اشانی سان بلوچستان ءِ سرا یک دم کپگ ءَ انت-گار ءُ بیگواهی ءِ تہ ءَ گیشی آیگ ءَ انت-ژانگولیں لاش استان ءِ زوراکی ءَ وت پدّر کنگ ءَ انت-اِکس زلم ءُ زوراکی ءَ ابید پدا هم استان ءِ زوراکیانی هلاپ ءَ " عوامی تحریک" چست بوتگ۔ ریاست لس مھلونک ءِ پاد آئیگ ءَ یک تُرسے پیدا کرتگ چو مہ بیت ریاست ءِ بدنامیں کار جھان ءِ دیم ءَ آسانی ءَ پدر کنگ بہ بنت پمشکا ھما انت بلوچ یکجہتی کمیٹی ءِ راجی مُچی ءِ بندات کنگ بوتگ ریاست ءَ بلوچ مھلونک ءِ گار ءُ بیگواھی کنگ گیش کرتگ چوشیں روچے نہ انت ھشت ءُ دہ ورنا گار ءُ بیگواہ نہ بیت ۔ ریاست ءَ کریک ڈاؤن بندات کرتگ آئی کم زانتی انت کہ مھلونک نون پہ لٹ ءُ ٹوپ دارگ نہ بیت ھمنچو گیش ریاست جبر کنت مھلونک ھمنچو پاد کیت ۔ مرچی راجی مُچی ءَ بلوچستان ءِ تہ ءَ راجی جُنز ءِ تہ ءَ گیشی آرتگ مھلونک ءِ دل ءَ تُرس ھلاس کُرتگ بلے ھمے جنز تاں آسری دارگ انت چو مہ بیت اے تھنا لھتیں وھد ءَ برجم دارگ بہ بیت رند ءَ ریاست یک ، یک ءَ ورنایاں گار ءُ بیگواہ کنگ بندات بہ کنت مھلونک گیش مایوس بہ بیت آئوکیں وھداں چوشیں مُچیاں در مہ کپ آنت ۔ ھر وھداں راجی جنزاں رھشون جوانیں سوبمندیں راھاں بر آنت ھما وھداں کہ رھشون جوانیں پیسلہ زور ایت گڑا جنز وتی رنگ ءَ مٹ کنت۔
سنگتاں دیمتر ءَ تران کنان ءَ گْوشت دومی نیمگ ءَ بہ چار ایں پشتون ھم بلوچ ءِ رنگ ءَ اے ریاست ءِ تہ ءَ لٹ وران انت ءُ آیانی کُشت ءُ کوش برجاہ انت-هنچوکہ انوں ما دیست بنو ءَ مزنیں کچے ءَ پشتون لس مھلوک در اتک آیاں یک امن مارچے کرت-همے لوٹ کرت-پشتون چُکچینی دارگ بہ بیت-نوں گیشتر پشتون دمگ ءَ فوج کشی مہ بیت- گیشتر پشتوتانی کشت و کوش مہ بیت امن مارچ ءِ سر ءَ اسٹریٹ فائر کنگ بوت بازیں مردم شھید ءُ ٹپی کنگ بوت انت
دومی نیمگ ءَ چارئے کرم ایجنسی پارچنار ءَ یک ھپتگے بیت دو سلاهبندیں گروپانی میان ءَ یک مزنیں جنگے برجاہ انت 5O چہ گیش شھید ءُ بے کساس ءَ مردم زدگ بوتگ انت -یات بہ بیت کرم ایجسی ءِ جاور ھما وھد ءَ ھراب بوت انت وهدیکہ پاکستان 90 ءِ دھک ءَ طالبان هیل(ٹریننگ ) دات آنت اوگانستان راہ دیگ بوت آنت گڑا کرم ایجنسی ءَ چو کہ شیعہ فرکہ ءِ گیشترین آبادی انت اودا طالبان وتی کیمپ جوڑ کرت۔ لس مھلوک گیشتر شیعہ آنت یک فرقہ واریتی جنگے چست بوت گڑا طالباں را پاکستان فوج کمک گون بیت آیاں باز جاہ ءَ ارش کُرت فرقہ واریت ءِ جنگ چست بیت ۔ ائے رند ءَ ما گندگ ایں اگاں شیعہ ءُ سنی میان ءَ جنگ بیت گڑا فرقہ واریت ءِ نیمگ روت دوئین نیمگ ءَ پشتوں جنگ بیت۔
گُڈ سر ءَ بازیں جست ایر کنگ بوت آوانی سر ءَ جوانیں رنگے ءَ تران کنگ بوت ۔
