15/06/2026
⚠️بتقرا بالساعات، وبتسهر الليالي..
وفي النهاية بتحس إنك ما طلعت بحاجة؟
كلنا مر علينا السؤال البنكون عارفين الصفحة القاعد فيها والباب اللي هو قاعد فيه بس برضو ما بنتذكر إجابته
ايوا الزول بكون قرا وذاكر وراجع بس في النهاية بيجي ينسى😞
ودي مشكلة بتواجه أغلب الطلاب على اختلاف تخصصاتهم
والحل ما صعب على فكرة، في حبة تقنيات كدا بستعملوها المتخصصين والطلبة المتميزين بتكون هي النقطة الفارقة بينهم وبين باقي الناس
يلا تعالوا مع بعض نضرب عصفورين بحجر واحد، ونعرف كيف نسهل على نفسنا المذاكرة والتعلم الذاتي في أول بوست من سلسلتنا ونشوف المهارة اللي لو أتقنتها، حتغير نظرتك للقراية وللجامعة وللحياة كلها.. مهارة (تعلم كيف تتعلم):
💡استراتيجيات عملية:
🔸تقنية البرومودور(تقنية الطماطم🍅) دي بنستخدمها في بداية قرايتنا نقطع بيها المماطلة وكمان عشان ما نمل بتعتمد على تقسيم الوقت 25د تركيز في القراية 5د تاخد استراحة
🔸جلسات التركيز العميق يلا دي لما تتمرس على البرومودور تحاول تبدا عليها بإنك تزيد مدة الجلسات كل مرة لحدي ماتصل 90د !!!
كدا حتكون عمقت فهمك في المادة واستوعبت اكبر قدر منها
🔸بتتذكروا زمان لمن كنا صغار بقرونا الدرس في المدرسة يخلص الشرح نكتبو نرجع البيت بنشتغل عليه واجب ولما نكمل الباب بكون في اختبار وتاني بعديها بجي الامتحان…
نحنا بدون ما نعرف كنا بنطبق تقنية من أعظم التقنيات الا وهي "التكرار المتباعد" بتشتغل على تكرار المعلومة قبل ما العقل ينساها فالمعلومة اتلقيتها هسي لازم تتكرر في اليوم البعده وفي الاسبوع البعد التلقي وفي الشهر البعده كمان
🔸في ناس بخافوا يشرحوا لزملائهم خوفاً من انه المعلومة تطير منهم لكن رسولنا عليه الصلاة والسلام بقول: (زكاة العلم نشره) والعلم الحديث هسي قايم بنظرية فاينمان البتقول لو انت درست حاجة حاول اشرحها لطفل عمره 10سنوات لو ما قدرت اذن انت ما فهمت فإنت حاول اشرح الحاجة القريتها لأي واحد من أخوانك أو اشرح لنفسك بطريقة بسيطة وأي زول داير بشرحو ليه إنت اشرح!غير انه حيقع ليك أكتر حتكون أخدت أجر كتير يحسب ليك بإذن الله زكاة وقضاء لحاجة أخيك
💰ودي شوية مصادر ممكن تستعينوا بيها
🔹قناة أحمد أبو زيد.
دي قناة على يوتيوب بتقدم محتوى عن المذاكرة والتركيز وتنظيم الوقت.
🔹Ali Abdaal دا برضو زول رهيب بديك تقنيات عن الدراسة والانتاجية
🔹Anki برنامج تقدر تطبق بيه تقنية التكرار المتباعد
🔹Focus to do و Forest تطبيقات ممتازة لتقنية البرومودور
🔹Notion تطبيق مشهور لتنظيم وربط الأفكار.
🔹كورس (Learning How to Learn) على منصة Coursera: الكورس الأشهر عالمياً والبيشرح ليك كيف عقلك بيشتغل وكيف تخزن المعلومات بذكاء.
شاركونا في التعليقات: 👇
هل جربتوا وحدة من الاستراتيجيات دي قبل كدة؟ وشنو أكتر مشكلة بتواجهكم وأنتوا بتذاكروا؟
