01/10/2026
Nakikiisa ang Departamento sa pagkondena sa redtagging kay Prop. Reynele Bren Zafra, PhD!
𝐏𝐀𝐇𝐀𝐘𝐀𝐆 𝐍𝐆 𝐔𝐏𝐋𝐁 𝐃𝐄𝐏𝐀𝐑𝐓𝐀𝐌𝐄𝐍𝐓𝐎 𝐍𝐆 𝐇𝐔𝐌𝐀𝐍𝐈𝐃𝐀𝐃𝐄𝐒 𝐇𝐈𝐍𝐆𝐆𝐈𝐋 𝐒𝐀 𝐏𝐀𝐍𝐑𝐄-𝐑𝐄𝐃-𝐓𝐀𝐆 𝐒𝐀 𝐈𝐒𝐀𝐍𝐆 𝐊𝐀𝐒𝐀𝐏𝐈𝐍𝐆 𝐆𝐔𝐑𝐎
Sa isang Facebook post ni Badoy na may FB name na Lorraine Baddie noong ika-21 ng Setyembre 2026, kasabay ng anibersaryo ng proklamasyon ng Martial Law, binanggit ni Badoy na pinasok na ng CPP, NPA, at NDF ang mga paaralan at iniimpluwensiyahan ang mga kabataan. Hayagan niyang idinawit ang teksbuk na naglalaman ng pahina ng gawaing pagbasa sa artikulong “Kawalan ng trabaho sa Pilipinas, nagtulak kay Mary Jane Veloso na mangibang-bansa — Gabriela” ni Pher Pasion, na inilathala sa Pinoy Weekly noong 25 Abril 2015. Inilakip ni Badoy ang pabalat ng teksbuk at makikita ang pangalan ni Dr. Reynele Bren G. Zafra bilang may-akda nito. Ang kaniyang teksbuk ay may pamagat na Sipat-Suri: Batayang Kaalaman sa Iba’t ibang Isyung Panlipunan (Binagong Edisyon) na inilathala ng St. Augustine Publications, Inc. Sa pamamagitan ng pagsipi sa partikular na bahagi ng aklat, tuwirang inilalantad at itinuturo ni Badoy ang isang akademiko sa politikal na paratang at publikong red-tagging.
Kinukundena ng Departamento ng Humanidades ang panibago sa hindi natatapos na tirada at red-tagging ni Lorraine Badoy at mga kauri nito. Si Dr. Zafra ay kasaping fakulti ng Dibisyon ng Wika - DHUM at isa sa mga masusugid na g**o at tagapagtanggol ng wika.
Ang isang tekstong tumatalakay sa kawalan ng trabaho, kalagayan ng mga manggagawa, migrasyon, kahirapan, at/o iba pang suliraning panlipunan ay hindi pagpapahayag ng pagiging kasapi ng anumang organisasyong politikal. Nararapat na pag-aralan at pag-usapan sa loob ng mga paaralan at pamantasan ang ganitong mga paksa. Bahagi ng awtentikong pagkatuto ang paglalantad sa mga mag-aaral sa iba’t ibang teksto, pananaw, at usaping panlipunan upang matutuhan nilang magsuri, magtanong, at bumuo ng sarilin pag-unawa.
Ang red-tagging ay malinaw na hindi makabuluhang diskurso. Ang gawaing ito ay nagdudulot ng panganib sa mamamayan at nagbabanta sa dapat ay malayang katangian ng mga akademya at institusyong pang-edukasyon.
Naninindigan kami sa Departamento, kasama si Dr. Zafra, para sa patuloy na pagganap ng mga akademiko sa kanilang tungkuling magturo, manaliksik, magsulat, at magpaunlad ng kritikal na pag-iisip. Mabuhay ang mapagpalayang edukasyon!
