23/09/2026
Noong Setyembre 21, 2026, matagumpay na isinagawa ng University of the Philippines School of Library and Information Studies Student Council ang educational discussion na Suriin at Sariwain na may temang "Archives, Erasure, and Memory: Information and Documentation in Remembering Martial Law" bilang pag-alala sa ika-54 na taon mula nang ideklara ng dating diktador na si Ferdinand Marcos Sr. ang Batas Militar sa Pilipinas. Sa diskusyong ito, nakatuon ang pokus sa papel ng mga librarian noong panahon ng Batas Militar.
Nagsilbing tagapagsalita si Professor Iyra Buenrostro-Cabbab, PhD, kung saan tinalakay niya ang lihim na pag-aalaga ng mga librarian sa mga information materials, handbills, leaflets, at pamphlets na naging Philippine Radical Paper. Idiniin niya rin ang papel ng mga librarian bilang mga indibidwal na nangangala ng mga kaalaman at kahalagahan ng mga sulat at libro kung saan sila ang mga naging aktibista sa paninigurado na ingatan ang mga impormasyon sa kabila ng mahigpit na pagbabawal sa panahon ng Batas Militar.
Lubos na nagpapasalamat ang UP SLIS SC sa lahat ng dumalo sa talakayang ito. Maraming salamat din sa U.P. School of Library and Information Studies Library at sa UPSLIS sa kanilang suporta mula sa pagpaplano hanggang sa pagsasagawa ng diskusyong ito. Hangad ng konseho na makatulong ang inisyatibong ito bilang paraan ng pag-alala sa madilim na kabanata ng kasaysayan ng Pilipinas sa kabila ng pagkalat ng disimpormasyon at pagbaluktot ng kasaysayan. Tandaan natin na bahagi ang pagkilala sa nakaraan tungo sa pagtataguyod ng ating kinabukasan.
Ukitin sa isip, harapin, at patuloy na alalahanin.
